HTE Minister-in Mizoram State University dinna tur hmun a tlawh

Higher & Technical Education minister Dr Vanlalthlana chuan July 2, Nilaini khan Luangmuala Aizawl West College ram chhunga Mizoram State University dinna tur hmun leh hmalak tawhnate a tlawh.

Dr Vanlalthlana chuan, Mizoram State University chu hnam ro hlu a nih dawn thu sawiin, Aizawl West College thuneitute chu a hmun nghak an nih angin theihtawp chhuah turin a ngen a, "Mizoram State University din turin sorkar hmasain bul an lo ṭan tawh a, tu ta bil mah ni loin, Zo fate zirna-in pui tur a ni," a ti.

Sorkar thuchhuah tarlan danin, Mizoram State Legislative Assembly-in Mizoram University Bill, 2025 a pass hnuah sorkar chuan hma lain, tunah hian a hmun turte laiha sak mek a ni a; university atan college hrang hrang hman ṭangkai phawt hnuah school hrang hranga siam chhoh a, university tura ruahman a ni ang.

Aizawl West College campus hi administration ṭhuthmun atan buatsaih mek a ni a; State Universiy dinna turin SASCI aṭanga hmuh cheng vbc 30.4 hmanga bul ṭan niin, sum mamawh dangte sorkar laipuiah thlen a ni tawh bawk.

HTE Minister hi Education consultant Rev. Dr K Thanzauva'n a ṭawiawm a; Aizawl West College principal Prof. C Lal-thlengliana leh thawktu dangte'n an lo dawngsawng a ni.