KHAWTHLIR

Indian Christian Day

Nimin kha Indian Christian Day a ni a, Indian Christian Women's Movement (ICWM), Mizoram Unit leh Magdelene Missionary Society (MMS) ten Chanmari YMA Hall-ah an hmang. MMS treasurer Malsawmi'n a kaihruai a, ICWM Mizoram president Maria Hmangaihzuali'n Indian Christian Day leh thupui 'Christian contribution in literacy, literature, and language development in India' tih sawifiah. Rev. Fr. James Zodinliana'n 'Zirtir Thoma martarna leh Indian Kristiante' tih thupui a sawi bawk.

Power awm dawn lo

Power & Electricity department chuan naktuk July 5, Inrinni chawhma dar 10 aṭanga chawhnu dar 2 inkarah 33KV Zuangtui Sub Station-ah hna an thawk dawn. Hei vang hian Ramthar Tlangveng leh Ramhlun chin Aizawl hmar lam leh chhuah lam vengte bakah, Tuirial khua thlengin kawlphetha an hmu dawn lo.

English literacy

Lunglei DC Office leh Disha Foundation chuan July 2, Nilaini khan Lungsen Aspirational Block huam chhunga primary school 10-ah zirlaite'n English zirnaa hma an sawn theihna tura ruahman 'Elementary English Literacy Programme' an kalpui ṭan. Sikul 10-ah hian zirlaite'n English an thiam dan hriatna tura enchhinna, Pre-Assessment Test buatsaih a ni.

Iskut thar tlem chhan zirho

Mission Foundation Movement (MFM) leh Mizoram Iskut Growers Association chuan nimin khan Sihphir YMA conference hall-ah Sihphir leh a chhehvela iskut thar a tlem chhan leh iskut thar a hlawk leh theih dan tur zirhona, 'Understanding the decline of chow chow Farming in Sihphir' an buatsaih. Durtlang, Sihphir leh Lungdai aṭangin mi 30 an tel a, MFM director R Vanlalzauva'n kaihruaiin, project manager HL Rinawma leh project coordinator Lalmuanpuii ten thil pawimawhte an sawi.