Ropeway leh Skywalk project titawp tawh; ACB-in an chhui mek - Tourism dept.

Tourism department chuan thuchhuah siamin, Chaltlang-Durtlang Ropeway leh Sakawrhmuituai Tlang Skywalk project-te chu sorkar laipuiin a tihtawp tawh thu leh, Anti Corruption Bureau (ACB)-in an chhui mek avangin file leh bill zawng zawng an hnenah a awm thu an tarlang.

Tourism department chuan, Ropeway leh Skywalk project-te chu Mizoram Lokayukta thupek angin ACB-in an chhui mek thu an tarlang a, "A file leh bill zawng zawngte pawh an kutah a awm vek. December 2023 khan he project hi Central sorkarin a titawp tawh. April 2019 chhungin 5th RA Rs 3,17,79,037 release a awm ngei a, a release-na component zingah bill aṭanga a lan dan chuan Skywalk pawh a tel ngei a ni," an ti.

Tourism department tarlan danin, Swadesh Darshan 1.0 hnuaiah project pahnih a awm a, ropeway leh skywalk te chu project hnuhnung zawk, 'Development of Eco-Adventure Circuit Aizawl - Rawpuichhip - Khawhpawp - Durtlang - Chaltlang - Sakawrhmuituai Tlang - Muthi - Berawtlang - Tuirial Airfield - Hmuifang, Mizoram under Eco-Circuit theme of Swadesh Darshan' hnuaia hna (component) 152 zinga mi a ni. Ropeway chu Durtlang site hnuaia component 16 zinga pakhat a ni a, Skywalk chu Sakawrhmuituai Tlang site hnuaia component 19 zinga pakhat a ni.

Project atan sorkar laipuiin a tirah March 27, 2017 khan sum 20% a pe chhuak a, a hnuah sum hi vawi hnih a pe chhuak leh tih Tourism chuan an tarlang a, "Hengah hi chuan Central hian a hlawmin a rawn release mai a, site-wise/item-wise angin a release ngai lo. Central sum release tawh zawng zawng hi cheng nuai 4,953.10 a ni a, total sanction amount nuai 9,907 aṭanga chhûtin 49.99% (i.e 50%) a ni. Site tin leh item tin atana sum release hi 50% of sanction amount anga chhût a ni," an ti.

SUM PEK CHHUAH DAN

27.3.2017 - Nuai 1,981.00

29.9.2017 - Nuai 2,482.16

17.9.2018 - Nuai 489.94

TOTAL  - Nuai 4,953.10

Ropeway leh Skywalk hi adventure components hnuaiah a awm a, hna thawk turin adventure components atan JV NEIP & Ropeway & Resorts Pvt Ltd. leh civil construction work atan Lushai Engineers rawih an ni.