Aizawl kawt chhuah hmun hnihah wholesale market sak a ni dawn

Agriculture depart­ment hmalakna hnuaiah Aizawl kawt­chhuah hmun pahnih­ah thlai thar zawrhna tur, agriculture produce whole­sale market sak a ni dawn a, hemi atan hian pawisa pawh tihfel a ni tawh.

Vanglaini palai zawhna chhangin Agriculture & Farmer Welfare minister PC Vanlalruata chuan, Aizawl kawtchhuah hmun pahnihah wholesale market sak a nih tur thu a sawi a, "Sihphir leh Melriatah a sakna tur hmun kan ruahman tawh. A sakna atan cheng nuai 1,000 kan nei tawh a, cheng nuai 500 ve ve hmanga sak tur a ni," a ti.

PC Vanlalruata chuan, market building drawing an buaipui mek tih sawiin, "Drawing peih a nih hunah tih tur ṭulte kan ti ang a, building sak hna ṭan a ni ang," a ti a, an ṭan theih thuai a beisei thu a sawi.

Aizawl chhak leh thlang lama kawt­chhuahah pawh wholesale market sak tum a nih thu sawiin Minister chuan, "Kan lo sawi tawh angin Aizawl kawtchhuah hmun paliah wholesale market sak ngei kan tum. Hmun hnih danga sakna tur kan dil leh mek a, min rawn pek leh thuai kan ring. RKVY scheme aṭanga sak tur a ni," a ti.

Agriculture & Farmer Welfare Minister sawi danin, agriculture produce wholesale market-ah hian thlai thar vawn ṭhatna tur cold storage, kut hnathawktute hah­chawlhna (rest room) bakah, ATM booth-te dah tum a ni.