Governor-in RIPANS a tlawh

Governor Dr Hari Babu Kambhampati chuan nimin khan Regional Institute of Paramedical and Nursing Sciences (RIPANS)-a khum 100 awmna tur damdawi-in sak thar leh hmasawnna ruhrel dangte a tlawh. RIPANS Hospital hi kumin October-November velah hawn theih beisei a ni.

Governor hi RIPANS hotute'n an hmunhma leh hmasawnna hnathawh mekte an fanpui a; an mamawh leh harsatna te, RIPANS Hospital panna kawngpui siamṭha tura PWD an ngen chungchang te, kawlphetha leh tui lamah PHE leh Power & Electricity department-te puihna an mamawh thute an hrilh.

Governor pualin RIPANS Conference Hall-ah inkhawm tawi buatsaih a ni a, RIPANS director Dr Sanjay D Sawant-in kaihruaiin, administrative officer Dr Ruby Z Ralte-in RIPANS chanchin a sawi.

RIPANS hotute chu campus hmasawnna atan hna an thawh ṭhat thu sawiin Larsap chuan, "Nakin lawkah chuan RIPANS Hospital, tuna khum 100 awmna hi India rama sorkar damdawi-in ṭha filawr AIIMS, Delhi-te anga tihchangtun a nih ka beisei a, a taka hman theih a nih hunah Mizoram tan chauh ni lo, hmarchhak bial pumpui tan pawh healthcare sector-ah service ṭha zawk a belhchhah dawn a ni," a ti.

RIPANS hi kum 1995-96 khan North Eastern Council hnuaiah din a ni a, April 1, 2007 khan Ministry of Health & Family Welfare hnuaiah dah a ni.