Nute puala thing phun hun hmang

Women & Child Development leh Environment, Forest and Climate Change department chuan nimin khan Sakawrhmuituai Tlangah nute puala thing pakhat phun hmalakna, 'Ek Ped Ma Ka Naam and Plant4Mother Campaign' an buatsaih a, Social Welfare, Tribal Affairs, Women & Child Development minister Lalrinpuii'n a hmanpui.

'Ek Ped Ma Ka Naam and Plant4Mother Campaign' puala hun hmannaah hian Sihphir khawtlang hruaitute leh department-a thawktute an tel a; thing ṭiak 50 an phun a ni.

Minister Lalrinpuii chuan, campaign chu sik leh sa inthlak danglam zel do lêtnaa hmalakna pawimawh a nih thu sawiin, "Ramngaw chereu zel vanga harsatna a thlen loh nan thing phun kan uar a pawimawh a, hei hi kan tu leh fate tana kan mawhphurhna leh hmalakna tur a ni," a ti a; Sakawrhmuituai Tlang chu Swadesh Darshan kaltlanga chei ṭhat tum a nih thu a sawi.

Mi tin thinlungah thing phun pawimawhna nghet taka tuh a pawimawh thu sawiin Lalrinpuii chuan, "Hemi tur hian mi ṭhahnemngaite bakah sorkar leh tlawmngai pawlte kan ṭanrual a ṭul. Kan thing phunte hi kan tuchhuan la awm zel turte tana kan thilpek theih hlu ber a ni a, tuna kan thing neih sate humhalh chung zela thingphun kan uar a ngai a ni," a ti.

'Ek Ped Ma Ke Naam and Plant4Mother' hi sorkar laipui Ministry of Environment, Forest & Climate Change bultuma neih mek a ni a, hemi behchhan hian Ministry of Women & Child Development department pawhin hma a la. Mizorama anganwadi centre tinah thing phun tura hmalak mek a ni a, kumin September thla chhung hian anganwadi centre tinah thing pakhat tal phun hman vek tum a ni.