Mualkhang Gas Bottling Plant chei ṭhata tharthawh a ni dawn

Mualkhang Gas Bottling Plant chu Indian Oil Corporation Ltd. (IOC) sum cheng vbc. 225.71 sêngin chei ṭhata tharthawh a ni dawn a; chumi atana sanction order chu nimin khan IOC deputy general manager Z Lumding chuan Food, Civil Supplies & Consumer Affairs (FCSCA) minister B Lalchhanzova hnenah a hlan.

FCSCA department thuchhuah tarlan danin, kum 2006-a bul ṭan tawh Mualkhang Gas Bottling Plant chu Oil Industry Safety Directorate guideline tehnaah a tlin tâwk loh avangin January 2020 khan tihtawp a ni. Mizoram sorkar leh IOC ṭang dunin a hma aia lian zawka tharthawh tura hma an lakna kal zelah bottling plant hlui chu ṭhiah a, OISD 144 design mila a thar sak ṭhat tum niin, a thar dinna atana sum hman tur vbc. 225.71 chu pek chhuah a ni.

Cheng vbc. 225.71 hi July 4, 2024 khan IOCL chuan an pe chhuak tawh a, nimin khan sanction order chu FCSCA Minister pisaah kalin a hnenah an hlan.

Mualkhang Bottling Plant siam zawh a nih hunah chuan kum khatah gas metric ton 30,000 (30 TMTPA) pe chhuak thei tura duan a ni a, chu chu ni khata gas cylinder bûr 7,000 vel pe chhuak thei tur a ni.

Bottling Plant-ah hian gas metric ton 900 (cylinder 63,300) vel chhêk khâwl theihna a awm dawn a; khuarel chhiatna leh chhan hrang hrang vanga inkalpawhna buai thulhah state dang aṭanga eirawngbawlna gas lak luhah buaina a awm pawhin ni 9-10 chhung mamawh dah khawl theih a ni ang.

IOC hotute chuan Chief Minister leh FCSCA Mnister-in theihtawpa hma an lakpuina rah a nih thu sawiin, "CM-in IOC Chairman hnenah bottling plant sak ṭhat a nih theih nan biak ngaite a biak bakah, FCSCA Minister, Revenue Minister ni bawkin ram mamawh atan land lease renew leh ram mamawh belh atan land lease extension rang taka a tih avang leh hna ṭan vat a nih theih nan compensatory afforestation tur ram rang taka a hmuhsak avangin hnathawhna tur sum pawh hi rang taka sanction a ni," an ti.