Global Hand Washing Day hmang

Nimin kha Global Hand Washing Day a ni a, thupui chu ‘Hand hygiene for all’ tih a ni. He ni pual hian Mizoram Pollution Control Board (MPCB), State Nodal Agency for NGC leh Mizoram ENVIS Hub-te chuan Women’s Polytechnic Eco-Club-te thawhpuiin Hermon Children’s Home, Durtlangah hun an hmang.

Global Hand Washing Day hmannaah hian Hermon Children's Home awmte chu sahbawna kut sil fai pawimawhna leh kut sil fai dan ṭha an zirtir a; tunlai hripui léng Covid-19 laka himna tur pawhin kut sil fai chu a pawimawh ber zinga mi a nih thu an hrilh.

Hermon Children’s Home hnênah hian MPCB chuan an laboratory-a an siam hand sanitiser leh a hûnna (stand) an pe a; Mizoram ENVIS Hub buatsaih pamphlet leh poster hrang hrangte bâkah, Women Polytechnic zirlaite kutchhuak hmai tuamna ṭhahnem tak an pe a ni. MPCB chuan Durtlanga home leh centre hrang hrangah sanitiser leh hmai tuamna an sem bawk.



Share this Post

Login to comment
No Comments