ZMC-ah swab test chhunzawm

Zoram Medical College (ZMC) Covid-19 Laboratory chuan June 28, Pathianni an chawlh hnuah nimin khan swab sample an endik chhunzawm leh a, nimin tlai lam thlenga hriat theih chinah sample 500 vel endik tawh niin, nizan lam khan result a chhuah beisei a ni.

SRH-ZMC Covid-19 Bulletin nimin tlaia chhuakin a tarlan danin, nimina swab sample endikte chu State Referral Hospital-a enkawl lai te, Aizawl, Lunglei, Siaha leh Hnahthial district mite an ni.

Integrated Diseases Surveillance Programme (IDSP) chhinchhiah danin, June 27, 2020 tlai dar 5 thleng khan Mizoram aṭanga swab sample endik tawh zawng zawng chu 12,846 a ni a, nimin lama 500 vel endik nen 13,346 vel endik a ni tawh tihna a ni.

Swab sample hi a tirah chuan National Institute of Cholera and Enteric Diseases (NICED), Kolkata-ah endiktir niin, mi pangate sample en hman a ni a; a hnuah Guwahati Medical College-ah endiktir leh niin, mi 12-te sample endik a ni. Thlawhtheihna service tihtawp a nih hnuah Silchar Medical College-ah sample endiktir leh a ni a, sample 41 thawn hman niin, chu'ng zingah chuan Mizorama Covid-19 vei hmasa ber Rev. VL Hruaia Khiangte pawh a tel.

Covid-19 endik tawh dan

Swab sample test zat- 13,346 (vel)

* NICED, Kolkata- 5

* Guwahati MC- 12

* Silchar MC- 41

* ZMC- 13,050 (vel)

* Lunglei (Truenat)- 268

Screening tih tawh zat- 1,20,757+

Rapid antibody test zat- 16,438+




Share this Post

Login to comment
No Comments