MLA zingah Congress party MLA-te'n Covid-19 do nan an thawh tlem ber - ZPM

ZPM party chuan thuchhuah siamin, MLA-te'n Covid-19 dona atana hman tur sum an thawhah Congress party MLA-te'n May thla hlawh (basic pay) zawng zawng thawh mah se, MLA zingah sum thawh tlem ber party an nih thu an tarlang.

Congress MLA pangate'n Covid-19 dona atan thla khat (May thla) hlawh (basic pay) zawng zawng (100%) an pek tur thu an puang a; chuta an sum thawh tur Rs. 4,00,000 chu May 20-ah Chief Minister hnenah an hlân tih ZPM chuan an sawi. MLA-te basic pay hi Rs. 80,000 a ni.

ZPM chuan, BJP, MNF leh ZPM MLA-te pawhin Assembly Speaker pisaa an ṭhutkhawmnaah an hlawhpui (basic pay) aṭanga 30% thla riat chhung (May-December 2020) thawh tur leh an MLA fund aṭangin Rs. 50,00,000 ṭheuh thawh turin thutlukna an siam tih an sawi a, "He meeting-ah hian Congress Legislature Party (CLP) pawhin sàwmna an hmu ve reng chungin, programme dang an lo neih sa avangin an tel ve ta lo," an ti.

Congress party ni lo, party dang MLA-te'n Covid-19 dona atana thla riat chhunga sum an thawh tur chu Rs. 1,92,000 ṭheuh a ni tih sawiin ZPM chuan, "An MLA fund Rs. 50,00,000 ṭheuh an thawh tel dawn. ZPM MLA-te chauh (pasarih) thawh tur pawh an MLA fund tel loin Rs. 13,44,000 a tling," an ti. Hemi rual hian, hripui vanga Mizoram mipui ṭan rualna chu lawmawm an tih tak zet thu an sawi.

ZPM party thuchhuah chuan, Congress party MLA-te'n Rs. 80,000 ṭheuh, a vaiin Rs. 4,00,000 chiah an thawh a, an thawh tlem bik dawn tih sawiin, "Delhi lama an hotunu Pi Sonia Gandhi-i'n Congress party hotu sangte thutlukna a puan tâk, 'Lockdown vanga state danga tangkhangte mahni state-a an hawna rêl chuan man tur chu Pradesh Congress Committee-in tum tur' tih a puan tawh avangin, Mizoram mi, state páwna tangkhangte lo haw tur rél chuan man tur hi an hotu sangte thutlukna angin an tumsak ngei turah kan ngai a ni," an ti.



Share this Post

Login to comment
No Comments