Hnam tênau tana reservation siam nuaibo tumna MPCC-in an duh lo

Mizoram Pradesh Congress Committee (MPCC) chuan nimin khan Aizawl Press Club-ah thuthar thehdarhtute an kâwm a; hnam tênaute puala hmun hauhsak (reservation) nuaibo tumna an duh loh avangin, vawiin chawhma dar 12-ah Vanapa Hall kawtah dodalna an lantir dawn tih an sawi.

MPCC general secretary (i/c Minorities) TT Zothansanga chuan, BJP kaihhruai sorkarin India rama zirna-in leh sorkar hnathawk lâkna hrang hrangah scheduled tribe (ST), scheduled case (SC) leh other backward classes (OBC)-te tana seat reservation a siam ṭhin chu nuaibo tumin hma an la mek tih a sawi a, "Supreme Court hial thleng chhoin, heng reservation-te hi nuaibo mai theih dinhmunah a ding mek a ni," a ti.

TT Zothansanga chuan, India ramah hnam hnufual zawkte an rethei a, zirna lamah pawh hnam 

ṭha ho an pha lo hle tih sawiin, "Seat reservation hi hnam hnufualte tan hian a hlu hle a ni," a ti a; Mizoram aṭanga IAS, IPS leh central service dang tling te, doctor leh engineer zir leh zir chhuak zawng zawng zinga a tam ber chu ST (tribal) quota aṭanga lut an nih thu a sawi.

Tribal quota awm lo se chuan Mizoram aṭangin engineer leh doctor an awm mang dawn lo tih sawiin MPCC GS chuan, "All India service leh central service danga lut thei kan nei mumal hek lo ang. Hei hi kan hnam la naupan vang te, zirna lama kan hnufual deuh vangte leh zirna kan neih ṭhat tâwk loh vangte a ni tlangpui," a ti.

TT Zothansanga chuan, reser­vation nuaibo a nih chuan Mizote leh hnam tênau dangte'n India ramah hna ṭha leh sang an thawk ve mai mai thei tawh dawn lo tih sawiin, "Zirna lamah hnam ṭha zawkte kan la thlauh em avangin zirna ṭhaah kan kal ve thei lo ang," a ti a; India rama hnam hrang hrangte intluk tlang taka an awm theih hma chuan reservation chu a awm ngei a la ngaih thu a sawi.

BJP-in an tum ber chu - 'Hindu lal ram din' a nih thu sawiin Zothansanga chuan, "Chumi atan chuan sakhaw dang betu hnam tênau zawkte hi dîp ral vek an tum reng a ni. Chutiang tur chuan ṭhenawm rama Hindu náwlpui awmte India rama lak luhna tur dan CAA an tifel tawh. Kan sakhua leh hnam kalphung min thlaksak an tumna Uniform Civil Code pawh Parliament-ah pharh an tum mek a ni," a ti.

MPCC hruaitute chuan, hnam tênau zawkte tana reservation awm sa nuaibo tumna awm mek chu Congress party-in ṭha a ti lo tih sawiin, "He thil hi Mizoram leh hnam tana thil pawi tak thlen thei a nih avangin kan dodalna hi min thláwp turin Mizoram mipui, kohhran leh NGO hrang hrangte kan sáwm a ni," an ti a; central-a Congress an sorkar leh hunah chuan reservation nuaibo a nih loh tur thu an sawi a ni.



Share this Post

Login to comment
No Comments