Ramri chinfel duhdan zawhna Mizoram sorkarin a la chháng lo

Joint Action Committee (JAC) on Inner Line Reserve Demand (ILRD) memorandum thehluh bawhzuia sorkar laipuiin Assam-Mizoram ramri buai chinfel dan tur rawtna siam tura a hriattirna chu Mizoram sorkarin a la chháng lo.

JAC on ILRD hruaitute hnen aṭanga thu dawn danin, ramri chungchangah November 28, 2018 khan Prime Minister hnenah memorandum an thehlut a; an thlen ber chu - Mizoram leh Assam ramri chingfel tur leh boundary commission din tura ngenna a ni. Memorandum bawhzui hian sorkar laipui chuan sawifiaha chhanna pe turin Mizoram sorkar a hriattir a ni.

Ministry of Home Affairs (MHA) chuan Chief Secretary hnenah, ramri chungchanga Mizoram sorkar ngaihdan sawifiah tura tihna chu December 26, 2018-ah a thawn a; chumi hnuah kum 2019 chhung khan reminder vawi nga - February 20, April 10, May 19, August 16 leh September 24-ahte a thawn leh a ni. MHA lehkha hnuhnung berah hian rang taka an ngaihdan thawn turin Mizoram Chief Secretary chu a hriattir bawk.

February 11, 2020, Thawh­lehni khan chief secretary Lalnunmawia Chuaungo hoin sorkar official-te leh JAC on ILRD hruaitute an ṭhukhawm a, ramri chungchang an sawiho.

Ṭhutkhawmnaah hian Mizo­ram sorkarin chhanna a la pek loh chhan zawhna chhangin Chief Secretary chuan, "Boundary Commission din hi kan ram tan a ṭha zawk dawn nge, ṭha lo zawk dawn tih ngaihtuah phawt a ngai. Chuvangin, Central sorkar hi comment pek rih loh a ṭhain ka hria a ni," a ti.

JAC on ILRD chuan, Mizo­ram leh Assam ramri atana Mizoram sorkara Cabinet-in a pawm tâk Bengal Eastern Frontier Regulations (BEFR), 1875 chu official-a neih ve tawh ṭha an tih thu leh Cabinet-in a pawm tawh avangin chumi ang tak chuan Mizoram sorkarin ramri a hauh mai tawh tura an ngaih thu an sawi thung.

Meeting chuan, document awm ang angte zawn khawm zui a, a ṭul anga ngaihtuahho zel turin thu an dah a ni.



Share this Post

Login to comment
No Comments