Sports Minister-in dormitory building hawng

Sports & Youth Services minister Robert Romawia Royte, Mizoram Bharat Scouts & Guides vice president ni bawk chuan nimin khan State Training Centre, Tanhrilah dormitory building thar a hawng. In hi cheng nuai 113 sénga sak a ni.

Robert Romawia Royte chuan, Bharat Scouts & Guides-in mi 100 chuang riah theihna dormitory building an nei chu a lawmpui thu sawiin, Mizoramah fûr a rei ṭhin avangin Bharat Scouts & Guides camper-te'n harsatna an nei ṭhin tih sorkarin a hriat thu a sawi a, "Sports piah lamah youth affairs hi hnam hmasawn nan leh ṭhan zel nan a pawimawh a, rei tak chhung chu youth affairs-ah budget awm mang loin sorkar a lo kal ṭhin,'' tiin, budget-ah sum dah thuai a nih tur thu a sawi.

Sorkar thuchhuah tarlan danin, dormitory building leh a panna kawng siamna atan kum 2017-18 khan Mizoram sorkar aṭangin cheng nuai 120 hmuh a ni a, Vanlalhuma Ralte, Dinthar, Aizawl chu hna thawk tura thlan a ni. Contractor chuan October 3, 2018-ah hna a ṭan a, January 9, 2020 khan a zo.



Share this Post

Login to comment
No Comments