Essay & Painting Competition buatsaih

School Education department leh Indian National Trust for Art & Culture Heritage (INTACH) chuan nimin khan DIET Auditorium, Aizawlah India Hnampa Mahatma Gandhi kum 150 tlin lawmna pualin lemziak leh thu inphuahsiak 'Gandhi at 150 National Essay and Painting Competition’ an buatsaih a; Art & Culture minister R Lalzirliana'n a hmanpui.

R Lalzirliana chuan, Mahatma Gandhi pian champha vawi 150-na puala Essay & Painting Competition buatsaih a ni chu ṭha a tih thu leh intihsiaknaa tel tura zirlai ṭhahnem tak an kal khawm chu lawmawm a tih thu a sawi a; zirlaite chu zirna mai bakah, faina lamah hma hruaitu ni zel a, ram leh khawtlang tana chhenfakawm nih tuma theihtawp chhuah turin a fuih.

Art & Culture Minister chuan, Mizote hnam tlem leh naupang zawk nihna chu mi tihnualtu ni lo se a duh thu sawiin, Mahatma Gandhi-a'n a nuna mi dang a hneh dan te, mi inngaitlawm, mi dang ṭhatna duhtu a nihna te, harsatna leh buainate pawh inhnehtir loa a hmachhawn dante leh hnehna chang tura a tumruh dante chu zirlaite leh Mizo mipui tan entawn tlak a nih thu a sawi.

National Essay & Painting Competition-ah hian sikul 10 aṭangin pawl 7, 8 leh 9 zirlai 85 an tel a; Mahatma Gandhi-a'n khawtlang tana a thil tih lam te, Indian culture leh ram rohlu humhalh leh vawn ṭhat kawnga a hnathawh lam hawite thupuia hmangin an intihsiak a ni. Intihsiakna hawn inkhawm chu INTACH Mizoram Chapter convener P Rohmingthanga'n a kaihruai a ni.



Share this Post

Login to comment
No Comments