Zángnadawmna pêk phûttu pawlte'n KMMTTP kawng siam hna chawlhtir

Lawngtlai District Land Owner's Association (LDLOA) chuan Kaladan Multi Modal Transit Transport Project (KMMTTP) kawng siam hna thawk mektu company-te chu hna thawh chhunzawm lo tur­in nimin khan an hriattir. Hriattirna an pek chhan hi, KMMTTP laihnaa zangnadawmna an hmuh tur ang an la hmuh kim loh vang a ni.

LDLOA hian an ge­ne­ral secretary T Zatluanga hmingin nimin khan KMMTTP siam hna thawk mektu ARSS leh RDS hotute hnenah kawng siam hna chawlhsan tura hriattirna lehkha an pe a; "Vawiin thlenga KMMTTP road-in kan ram a tihchhiat man (compensation) chu sorkarin min la tihfelsak loh avangin, January 8, 2020-a OB meeting chuan stay ni se, tia a rel tawh chu bawhzuiin, January 13, 2020-a LDLOA Executive Committee meeting chuan a thlir nawn a. A chunga subject tarlan ang hian, January 14, 2020 aṭangin KMMTTP road-a in hna thawhte hi tiam chin awm loa châwl turin kan hriattir a che u," tiin an ziak.

LDLOA chuan, an thuchhuak chu zawm ngei turin kawng siamtute an chah a, "Hna thawh luih a nih chuan in chungah eng pawh thleng se, LDLOA chuan mawh a phur lo ang," an ti.

LDLOA hruaitute hnen aṭanga thu dawn danin, Lawngtlai District Collector (diostrict bawrhsap)-in KMMTTP kawng siamnaa zangnadawmna la thei tura a tih, Supplimentary Draft Award a siam, Mizoram sorkarin a pawm zat chu mi 303 a ni a; sum zat erawh an hre mai thei lo thung.

LDLOA stay order-in a huamte

1.Stay order hun chhung hian company motor eng chi mah KMMTTP road-ah a tlan tur a ni lo.

2.KMMTTP road-ah hian eng hna mah in thawk tur a ni lo.

3.Company hnuaia hna thawktu sub-contractor-te'n eng hna mah an thawk tur a ni lo.



Share this Post

Login to comment
No Comments