Kum khat hnuah pawh thutiam hlen an nei lo - Zodintluanga

Congress Legislature Party (CLP) leader leh Congress party-a treasurer Zodintluanga, MLA chuan, MNF party kaihhruai sorkarin inthlan dawna an thutiamte kum khat hnuah pawh hlen an la nei lo tih a sawi.

Zodintluanga hian nimin khan Lungleia Congress Bhavan hawnnaah thu sawiin, chief minister Zoramthanga'n inthlan dawnah intiamna a nei nual tih a sawi a, "A langsar ṭhenkhat chu - kawng chhâwng, cheng nuai thum sem, Aizawl traffic jam awm lohna khawpuia siamte a ni," a ti.

Inthlan hmaa MNF leh an president Zoramthanga thutiamte chu kum khat an sorkar hnuah pawh an la hlen lo nia sawiin Zodintluanga chuan, "Kawng chhâwng atan ban pakhat pawh phun a la ni lo. Cheng nuai thum sem intiamin cheng khat pawh an la sem lo. Traffic jam awm lohnaa siam a tum Aizawlah traffic a jam tulh tulh," a ti a; an thutiam chu kum khat chhunga tihlawhtling nghal tura an beisei loh rualin, hmalakna eng emaw tal a awm tur a nih thu a sawi.

CLP Leader chuan MNF sorkar chu zu zawrh titawp a, kawng danga zawrh tum leh mekah puhin, "CM hian a intiam ang ngeiin zu zawrh chu tihtawp a ni. Mahse, beng muka liam zawih zawih aṭangin pawisa thàl tur a hmu ta lo a nih hmel a, an pawisa nei lo, thil tiam hnem siin zu zawrh lam an hawi leh mek a ni," a ti.

MNF flagship programme SEDP chu a duang chhuaktu bera ngaih Dr R Lalthang­liana pawhin a sawi khát ta tih sawiin Zo­dintluanga chuan, "Hman ni khan Agriculture department-in SEDP sum an neih chu hman ṭangkai dan tur an sawiho a, department dang erawh chu thehhmeh ang ṭhiap an la ni si," a ti a; SEDP sum pek chhuah dan chu hriatthiam har tak a nih thu a sawi.

Congress party Treasurer chuan,. MNF sorkar chu kum khat ro an rel hnuah pawh Congress sorkar sum hmuh an la tlàn zel nia sawiin, "Tunah chuan kal ngaihna an hre lo ṭan. Construction lam thil ropui taka an minister-te'n an hawn ṭhinte pawh kan hun laia kan hmalak a ni. Central-ah an thawhpui BJP economy a tlakhniam em avangin local body inthlanna lo awm turah pawh SEDP lo tawktarh mah se, tuna kan dinhmun ang tho hian a hlawhchham leh dawn. Vote zawn nana an hman tur hi âwih chi a ni lo," a ti.



Share this Post

Login to comment
No Comments