Bru-te Tripura-a awm turin agreement ziah a ni dawn

Tripura state chhung, North Tripura dirtrict-a Bru relief camp-a awm mek Bru-te chu tuna an awmna hmuna an awm nghehna turin Ministry of Home Affairs hmalaknain January 16, 2020 khian New Delhi-ah inremna thuthlung (agreement) ziah a ni dawn.

Thu dawn danin, agreement ziah puala inkhawm neih tur chu Union Home minister Amit Shah-a'n a ho dawn a; Mizoram sorkar aiawh, Tripura sorkar aiawh, MHA aiawh leh Bru pawl aiawhte'n hming an ziak dawn a ni. Agreement ziahnaah hian sàwm an nih angin chief minister Zoramthanga leh Tripura Chief Minister-te pawh an tel ang.

MHA chuan Bru-te hnena ṭanpuina pek tur ang angte chu tuna an awmna hmunah a pe chhunzawm tawh dawn a, Mizorama voter ID nei mekte pawhin Mizoramah vote nei tawh loin, Tripura electoral roll-ah sawn tura tih a ni.

Bru-te'n Mizoram chhuahsana Tripura relief camp-a an awm hnuah ṭum 9 hruai kîr hna thawh a ni tawh a, chhungkaw tlemtê chauh Mizoramah an lêt duh. Hruai kîr hna thawh hnuhnung ber October-November 2019 chhunga Mizorama kîr ve lo Bru-te chu tuna an awmna hmunah awm nghehtir law law turin thutlukna siam a ni.



Share this Post

Login to comment
No Comments