Kan president hmalakna ka pawmpui - Dr R Lalthangliana

MNF vice president hlui Dr R Lalthangliana, minister chuan tun hnaia an party hruaitu chungchanga an president Zoramthanga hmalakna chu a pawmpui thlap thu a sawi a; hruaitu tharte chu Nomination Committee kal tlanga neih a nih thu a sawi.

Dr R Lalthangliana chuan, kum 33 chhung MNF party leh sorkarah mawhphurhna hrang hrang an hotute'n an chelhtir tawhnaah a lawm thu sawiin, "Tlin lohna leh fel lohna tam tak ka nei ang tih ka ring. Chuti chunga min duhsak ṭhintu kan hotute leh MNF worker zawng zawng chungah ka lawm tak zet a ni," a ti a; an party tana a lo tih ve tawh leh insensonate chu hnam martar-te inhlanna te, hnam tana mi tam takte tawrhna leh inpeknate nen khaikhin rual a nih loh thu a sawi.

Tun hnaia an hotupa berin hruaitu lu ber a nih anga an party insiamremna chungchanga ruahmanna a neih chu a pawmpui thlap tih sawiin R Lalthangliana chuan, "Party chhung inenkawlna leh sorkar hmalakna a chak zawk theihna tur a ni a, tuna kan hruaitu tharte hi Nomination Committee kaltlanga kan neihte an ni. He chanvo pawimawh tak chang theia an awm hi ka lawmpui tak zet," a ti.

Dr R Lalthangliana chuan, term thar atan mawhphurhna hrang hrang headquarters 

aṭanga unit thlenga an la siamrem tur thu sawiin, "Kei kei ti loin, Pathian leh kan ram tan tia ding nghet kan ni tih hre rengin, nang nang tiin kan rilru siam thar leh ila. Harh thar lehna (revival) hi he hnam party-a thlentirtu nih tum ila. Ram tana theihtawp chhuah tura inpe kan nih avangin hruaitu nih inchuhna a awm tur a ni lo," a ti a; tuna an party hruaitute chu a rin tâwk thu a sawi.

An party president leh chief minister ni mek Zoramthanga chu ram leh hnam vei em emtu a nih thu sawiin Dr Thangtea chuan, "Kan CM kaihhruainain Pathian hruaina hnuaiah rorelna thar vuanin, kum khat lek chhungin naménloin hmasawnna hriat reng tlak kan hmu mek hi a lawmawm hle mai. Isua Krista pian champha kan hnaih leh ta hle mai a, kan party worker zawng zawng te, Mizoram leh khawvel ram hrang hranga Zo fate, he Mizo Hnam Run kaltlang hian Krismas chibai ka bûk vek a che u," a ti.



Share this Post

Login to comment
No Comments