World AIDS Day pualin hun hmang Doctors Against HIV/AIDS din a ni - Health Minister

Nimin khan Aizawl leh Mizoram hmun hrang hrangah World AIDS Day hman a ni. A hmanna pui ber, Aizawlah chuan Mizoram State AIDS Control Society (MSACS) huaihawtin Vanapa Hall-ah hman a ni a, Health minister Dr R Lalthangliana'n a hmanpui. Minister chuan, tun hnaiah Mizoram sorkarin HIV/AIDS dona tichaka MSACS hnathawh pui turin Doctors Against HIV/AIDS (DAHA) din thar a nih thu a sawi.

Health minister chuan, Mizorama HIV/AIDS dona tihchakna tura MSACS hna­thawhna puitu tur Doctors Against HIV AIDS din tharah doctor inzawmkhawm pawl pahnih - Indian Medical Association (IMA) leh Mizoram Government Doctors Association-te an tel thu a sawi a, "Kan sorkar chhung ngeiin Mizoram hi HIV/AIDS do kawnga thawk 

ṭha ber a nih loh pawhin, top-5 ah tal chuan lan tuma ṭan lak kan tum a ni," a ti.

Dr R Lalthangliana chuan, Mizoram chu India ramah health leh literacy-ah hmingṭha viau mah se, mihring chêng zat chhûtin HIV hrik pai tam berna state a nih mek thu leh, chu chu a veiawm tak zet tih a sawi a, "MSACS emaw Health department emaw kut chauha dah loin, tih tak takna nen ngaituahna sên a, beidawng loa kil tin aṭanga theihtawp chhuaha beih tlân a ngai," a ti a; Mizoram mipui zawng zawng ṭanho a pawimawh thu a sawi.

Health Minister chuan, Mizoram Kohhran Hruaitu Committee leh Central YMA hruaitute nen Mizorama HIV do dan tur an sawiho thu sawiin, "December 9 hian kohhran ṭhalai pawl hruaitu hrang hrangte nen hmalakna kawng sawi tura ruahmanna siam a ni," a ti a; pawl hrang hrangte HIV/AIDS dona kawnga 

ṭhahnem an ngai chu lawmawm a tih thu a sawi a ni.

HIV/AIDS-in nasa takin retheihna a tipung thei tih sawiin R Lalthangliana chuan, "Hrisel lohna, retheihna leh harsatna naménlo thlentu, hnam suattu HIV darh nasa lutuk hi ngawihpui mai mai chi a ni lo, kan hnam mang mai tur hi a rama chengte leh a ram neitute'n thapui thawha kan do a ngai tawh a ni," a ti.

World AIDS Day hi December 1 niin, 1988-ah hman ṭan a ni a, kuminah Pathianniah a tlak avangin nimin khan Mizoramah hman a ni. Kumina Day thupui chu 'Communities makes differences' (Ṭanrualnain danglamna a thlen) tih a ni.

Report-a a lan danin, India ramah HIV hrik pai mi nuai 26 vel awm anga chhût a ni a, mihring chêng tam ram bikah HIV hrik pai tam ber pathumna niin, South Africa leh Nigeria chu India aia HIV hrik pai tamna ram a ni.



Share this Post

Login to comment
No Comments