Mizoram Bru lâk lêt hun a tâwp Tripura aṭangin official-te an lo kîr

Tripura refugee camp-a Mizoram khua leh tui Bru-te Mizorama lâk lêt hun chu November 30, Inrinni khan a tâwp ta a; Bru hruai kîr tura Mizoram aṭanga sorkar official thawk chhuakte pawhin November 30, 2019 khan Tripura chhuahsanin an rawn kîr. Hetih lai hian, Ministry of Home Affairs (MHA) chuan, Bru chungchangah Mizoram tana thu lawmawm tura thu­tlukna siam a nih tur thu a tarlang.

Bru hruai kîr thawh 9-na hi October 3, 2019-ah ṭan niin, November 30 thlenga lak let hna thawh tura ruahman a ni a; Mizoram sorkara Council of Ministers meeting pawhin Bru lâk lêt hna chu November 30, 2019 hnu lamah chuan thawh chhunzawm loh turin thutlukna an siam a ni.

Bru lâk lêt hna thawh chhung hian chhungkaw 200 chuang hret Mizoramah an rawn lêt a; Mizorama let zinga ṭhenkhat chu sorkar official-te'n Tripura relief camp aṭanga an lâk lêt an nih laiin, an camp aṭanga Mizoram (Kanhmun) pana Mizorama lêt eng emaw zat an awm bawk.

Home department aṭanga Vanglaini thu dawn danin, Mizoram Council of Ministers thuchhuak leh hruai kîr hna thawhna tura road map siamah November 30, 2019 thleng Bru hruai kîr hna hi thawh tur a nih avangin, Mizoram aṭanga Bru hruai tura sorkar official kalte chuan November 30, Inrinni khan Tripura an chhuahsan a, Mizoram an pan a ni.

MHA thutlukna angin, Mizoram Bru, Tripura-a awm mekte chu October 2019 aṭangin Mizoramah hruai kîr vek tur leh an awmna camp pawh ṭhiah nghal vek tura tih a ni a; sorkar laipuiin a thlawna ration a pek pawh tihtawp nghal tura tih a nih avangin, kumin October thla tir aṭang khan Bru camp-a ration pek ṭhin chu tihtawp a ni.

Bru-te erawh chuan free ration pek chhunzawm an phût a, kawngpuite pawh an dan phah a; mahse, sorkar laipui (MHA) chuan a pek chhunzawm lo a, Tripura sorkar erawh chuan kumin November thla chhung atan chauh a thlawnin ration a pek chhunzawm thung.



Share this Post

Login to comment
No Comments