Mipuiin an chanvo an hmuh theih nan Hma kan la zel dawn - Supply Minister

Food, Civil Supplies & Consumer Affairs (FCSCA) minister K Lalrinliana chuan, Mizoram Carrying  Contractors Association (MCCA) leh Mizoram Truck Drivers Association (MTDA)-te inkar buaina awm mek karah Mizoram sorkar chuan mipuiin an chanvo an hmuh theih nan hma a lak tur thu a sawi. Hetihlai hian MTDA-te chuan nimin aṭang khan nawrh an huaihawt an titawp.

K Lalrinliana hian November 30, Inrinni khan Aizawl Press Club-ah thuthar thehdarhtute a kâwm a; MCCA leh MTDA-te'n FCI kudam (food storage depot) aṭanga buhfai phurh hmasak dan tur indawt (serial number) leh hlanthlak (unload) hmasak dan indawt enkawl/ruahman chungchanga inrem lohna an neih vangin MCCA hnuaia thawk truck driver-te'n FCI kudam aṭangin buhfai an phurh duh loh thu leh, chuvang chuan Mizorama kudam hrang hranga dah tur buhfai tangkhang eng emaw zat a awm mek thu a sawi a ni.

K Lalrinliana chuan, MCCA leh an hnuaia buhfai phura inhlawh leh chhawng truck drivers (Mizoram Truck Drivers Association)-te  thu inchuh chu FCSCA department-in a hriat thu sawiin, "November 29, Zirtawpni khan pawl pahnih hruaitute hi ka room-ah department official-te nen  inremtir dan kawng zawngin kan sawiho a, inremna a awm dawn emaw kan tih laiin an inrem thei ta tlat lo a, a zia lo khawp mai," a ti.

FCSCA Minister sawi danin, MCCA leh MTDA an inrem theih loh avangin November 30, Inrinni zingah chief minister mawhphurhna la mektu deputy chief mi­nister Tawnluia hoin minister pahnih Lalchhandama Ralte leh Lalruatkima te, chief secretary charge la mektu JC Ramthanga leh FCSCA department official-te chuan Dy. CM inah hmalak dan tur an sawiho a ni.

MCCA leh MTDA an inrem thei lo chu pawi an tih thu sawiin K Lalrinliana chuan, "Anni hamṭhatna duh vanga mipuiin an tawrh kan remti lo a, a ṭul a nih chuan sorkar driver leh sorkar motor-te hmangin FCI kudama buhfaite kan phur ang a, an motor-te pawh kan mansak mai ang," a ti.

Minister chuan, tun December thla atana buhfai sem tur nei daih lo tur Supply centre (kudam) 35 a awm thu te, chu'ng kudamte buhfai pekna tur leh FCI-a Mizoram buhfai la tangkhang zawng zawngte phurh chhuah a nih theih nan sorkarin December 2, vawiin aṭangin hma a lak ṭan dawn thute a sawi bawk.

FCSCA department hotute chuan, MCCA leh MTDA inhriatthiam lohna vangin FCI weighbridge tihchhiat, tui-ûm (bottle)-a invawm, motor bula bomb dah leh invauna te, dan palzûtna leh pawikhawihnate a awm thu an sawi a, "FCI, MCCA leh sorkar department-te'n FIR pali an thehlut tawh," an ti.

Kolasib DC hnen aṭanga thudawn danin, MTDA-te chuan carrying contractor-te nen an inkar avanga nawrh an huaihawt chu Supply Minister hmalakna avangin nimin khan an titawp a ni.




Share this Post

Login to comment
No Comments