Amit Shah-in NGO leh party-te a kâwm Mizoramin CAB a dodal thu an thlen

Union Home minister Amit Shah leh Mizorama tlawmngai pawl leh political party hrang hrang hruaitute chu November 29, Zirtawpni zan dar 11:30 khan Delhi-a Assam House-ah an inkâwm. Amit Shah-a'n Mizo mipuite chu Citizenship Amendment Bill (CAB) thláwp tura a ngen laiin, Mizoram aṭanga telte chuan CAB chu khauh taka an dodal thu an sawi. Amit Shah chuan, Tripura-a Bru la awmte Tripura khua leh tui an nih tawh dawn thu a sawi bawk.

Amit Shah chuan, Lok Sabha-a CAB pass tura sorkar inbuatsaih dan sawiin, "CAB hi Lok Sabha session kal mekah put luh a ni ang a, pawm ngei a ni dawn. Ram pumah hman tur a ni a, chumi atan chuan draft bill siam mek a ni. CAB hi NRC leh ILP-te nen a kal kawp dawn a, hmarchhak state-te tan harsatna a thlen phah dawn lo," a ti.

CAB chu dan (act) a nih hunah chuan ILP chu bung pakhatah (proviso-in) dah a ni dawn nia sawiin Amit Shah chuan, "ILP hmanna state tan inhumhimna dan nghet zawk a awm ang," a ti a; Mizoram bik tan international boundary veng turin, CRPF/BSF battalion pahnih, Mizo hlîr awmna siam a nih tur thu a sawi.

Union Home Minister sawi danin, NRC chu foreigner laka inven himna atan hman a ni a, ILP chu a hmanna state-te'n state páwn lam mi zawng zawng laka inhumhimna atan hman a ni thung.

CAB hman hunah cut off year (a huam chin kum) atan December 31, 2014 hman a ni dawn a, sakhua vanga nêkchêpna tuar, kum ruk kal ta (December 31, 2018) hma lama India rama lutte chauhin CAB hmangin India khua leh tui nih an dil thei dawn a ni.

Tripura refugee camp-a Mizoram Bru-te chungchangah Amit Shah chuan, "Bru hruai kîr tumna a awm tawh dawn lo a, tuna Tripura-a la chámbángte chu Tripura khua leh tui an ni tawh ang," a ti.

Meeting-a Mizoram aṭanga telte chuan, Bru hruai kîr hna tihtawp chungchangah te, ramri veng turin central force battalion pahnih Mizo hlang awmna siam leh Constitution-a ILP proviso-a dah chungchangahte chuan lawmawm an tih thu an sawi a, "Mahse, hengte hi CAB nena inkaihhnawih lo thil a nih vangin CAB thlàwp phahna turah kan ngai lo," an ti a; hmarchhak bial leh Mizoram tan CAB chu thlàwp ngawt theih a ni lo tih an sawi.

Vanglaini palai zawhna chhangin Central YMA president Vanlalruata chuan, Amit Shah nena an inkawmnaah lawmna tur leh lawm lohna tur a awm rih loh thu a sawi a, "Draft bill an buatsaih dawn a, chu chu han hmu phawt ila. Chumi hnuah chuan thil lawmawm lam a nih leh nih loh a hriat theih dawn a ni," a ti.

Amit Shah kawmnaa telte

HmingPawl/Party

VanlalruataCYMA President

B VanlaltánaMZP President

Lalnunmawia PautuMZP Gen. Secretary

Ricky LalbiakmawiaNESO Finance Secy

Dr JV HlunaBJP President

LalhmachhuanaCongress secretary

TJ LalnuntluangaMNF secretary (MoS)

Dr Lalrina ZahauNPP National GS

K SapdangaZPM Secretary General



Share this Post

Login to comment
No Comments