Police Commemoration Day hman a ni

Nimin, October 21 khan India ramah police duty laia thite hriatrengna ni, Police Commemoration Day a ni a, India ram hmun hrang hrangah hman niin, Mizoramah pawh Aizawl leh district hrang hrangah hman a ni.

Police Commemo­ration Day hi Aizawlah chuan zing dar 7-ah 1st battalion MAP hmunah director general of police (DGP) SBK Singh hoa hman a ni a; India ram hmun hrang hranga September 1, 2018 leh August 31, 2019 chhunga duty laia thi mi 292-te hming chhiar chhuah niin, sûnna hun hman a ni.

Mizoram police, duty laia hmelma kut tuara thi tawhte hriatrengna Martar Thlan, 1st MAP headquarters-ah DGP leh police officer-te'n pangpar an dah bawk.

Police Commemo­ration Day hmanna pui ber, National Police Memorial, Chanakyapuri, New Delhi-ah chuan Mizoram police aṭangin head constable Lalsangmawia leh constable R Lalnunpuia te an tel a; Mizoram Police aiawhin flag bearer-ah an ṭang a ni.

Serchhipah chuan Police Commemoration Day hi SP pisa kawtah an hmang a, SP R Sathiya­sundaram-a'n thu a sawi. Lawngtlaiah chuan SP Amit Goel hoin Lawngtlai Police Station kawtah hman a ni.

India ram chhunga awm Aksai Chin pêla ralthuam nena lut ru China sipaite chuan India ram venghim tura thawk (duty) mek India police-te chu Hot Springs (Ladakh)-ah October 21, 1959 khan an lambun a, police 10 an thi a ni. October 21, 1959 chu India sorkar chuan ram tana nun pe police-te hriatrengna leh chawimawina 'Commemoration Day' atan a puang a, ram pum­puiah kum tin hman a ni.

India rama state hrang hrangah September 1, 2019 aṭanga August 31, 2019 chhung khan police, duty laia thi mi 292 an awm a; Mizoram police zingah erawh chuan duty laia thi an awm lo.



Share this Post

Login to comment
No Comments