NSS-te bawlhhlawh tifaiin an hnatlang

National Service Scheme (NSS) huaihawtin nimin zing kar khan Aizawla zirna-in hrang hranga NSS unit-te chu Aizawl khawpui chhung kawng dung leh Lammual tifaiin an hnatlang a, Sports & Youth Services minister Robert Romawia Royte-in a hmanpui.

Hnatlangah hian Aizawla college leh higher secondary school 28 aṭangin NSS programme officer leh volunteer zirlai 800 chuang an thawk chhuak a; hmun pali - Sikulpuikawn, Aizawl West College leh Chanmari kâwn (via Zarkawt) leh Chanmari kâwn (via Electric Veng)-ahte chhuak khawmin, Lammual an panna kawng dunga bawlhhlawhte an chhar khawm a ni.

Lammuala an luh khawm hnuah Lammual leh a chhehvel an thian fai leh a; bawlhhlawh an chhar khawmte chu bawlhhlawh paihna hmunah an paih a ni.

Hnatlang an zawhah Lammuala inkhawm tawi buatsaih a ni a, state NSS officer Dr Zirlianngura'n a kaihruai. SYS minister  chuan, NSS volunteer-te chu ram, khawtlang leh mipuite tana thil ṭha ti 

ṭhin, mi dangte entawn tlaka hna thawk ṭhin an nih thu sawiin, "NSS hi ṭhalai tam tak, ruih theih thil laka an fihlim theihna tura venghimtu leh ruihhlo bâwiha tángte chhanchhuaktu a ni," a ti a; NSS volunteer-te chu faina chungchanga mi dangte zirtirtu ni tura a fuih rualin, NSS-ah chuan Mizo ṭhalai tam zawk tel se a duh thu a sawi.



Share this Post

Login to comment
No Comments