PMAY-U in sak ṭanpuina dawng lote an buai

Sorkar laipui duan, Pradhan Mantri Awas Yojona - Urban (PMAY-U) hnuaia in sak ṭanpuina la dawng lo chhungkaw eng emaw zat chu sorkar laipuiin an in sak tawh thlalakte (still photo leh video clip) thawn tura ngenna leh hriattirna an thawn. Hei vang hian in la sa lote an buai a, sum chungchangah inrinhlelhna a awm phah. UDPA department hotute erawh chuan, hlauhthawn tur a awm loh thu an sawi.

Thu dawn danin, PMAY-U hnuaiah hian in sak ṭanpuina chu instalment thuma pek tur a ni a, a vawi khatna leh vawi hnihnaah Rs. 60,000 ve ve leh a vawi thumnaah Rs. 30,000 pek tur niin, a vaiin Rs. 1,50,000 pek tur a ni. PMAY-U ah hian Mizoramah chuan UDPA department chu nodal department a ni.

August 9, 2019 khan PMAY-U (Housing for All) enkawl­tu joint secretary leh mission director Amrit Abhijat chuan ṭanpuina dawng tawha in pawh sa tawh nia an hriat mi eng emaw zat hnenah, in sak thlalak copy pali leh video clip (second 30-60 vela sei) thawn tura tihna leh lawmthu sawina a thawn a; chutiang chu Mizorama chhungkaw eng emaw zatin an dawng.

Sorkar laipuia joint secretary Amrit Abhijat hnen aṭanga lawmthu sawina leh in sak thlalak leh video thawn tura tihna dawng zingah in sak ṭanpuina la dawng lo hrim hrim leh in pawh la sa lo eng emaw zat an awma hriat a ni a; chutih laiin, in sak 

ṭanpuina dawng tawh leh in pawh sa tawh zingah thlalak leh video thawn tura tihna dawng lo an awm bawka sawi a ni.

Sorkar laipui aṭanga lehkha lo kal avang hian khaw ṭhenkhatah chuan tih ngaihna an hre lo hle a; V/C-te leh nodal department UDPA inkarah pawh inrinhlelhna a awm niin an sawi.

Ṭawi Assembly bial chhung khaw pakhata ṭanpuina sum hmuh hmanga in sa tawh anga lehkha dawng, ṭanpuina pakhatmah la dawng si lo mi pakhat chuan, "A dil zawng zawng chuan hmuh kan inring bik lo. Hmu ta lêm lote paw'n a hmute kan thîk chuang lo a, kan lawmpui zawk a ni. Chutih laiin, hetiang lehkha kan dawng leh ta si hi thingtlang pa tan chuan lungawi a har a, tu tih nge, eng vang nge, tih hriat kan duh khawp mai," a ti a. Ṭanpuina dil leh dawn se, sorkar laipuiah dawng tawh anga chhinchhiah an nih tawh avangin an tan kawng a ping tawh dawn hlea a hriat thu a sawi.

UDPA department hotute chuan Vanglaini palai zawhna chhangin, PMAY-U hnuaia in sak ṭanpuina Mizorama inpek danah thil dik lo a awm lo tih an sawi a, "In sak ting tang a, sak zawh mai theih si loh ai chuan, ṭanpuina pekte'n an sak zawh thuai theih nan a dawng tawhteah a hlawma pek chhuah a ni," an ti.

(Phek 2-ah zawm a ni)




Share this Post

Login to comment
No Comments