State Games hun atan Dec. 9-14 tinzawn

Sports & Youth Services minister Robert Romawia Royte hoin September 9, Thawhṭanni khan Secretariat conference hall-ah Mizorama State Games neih dan tur sawiho a ni a, State Games chu kumin December 9-14 chhunga neih tura ruahmanin, category ṭhen dan ngaihtuahtu tur leh kalphung ruahmantu tur sub-committee an din.

Robert Romawia Royte chuan, State Games chu Mizo ṭhalai infiammi, theihna nei ṭha tak takte thur chhuahna tur pawimawh tak a ni tih sawiin, Mizo mipuite'n hriselna ṭha an neihna tura hmanraw pawimawh tak a nih theih nan Mizoram sorkarin a ruahman a nih thu a sawi.

Meeting chuan, State Games-ah infiamna chi hrang a tam thei ang ber telh ni se, an ti a; category ṭhen dan ngaih­tuahtu tur sub-committee leh inelna neih dan tur kalphung ruahmantu tur sub-committee dinin, sub-committee-te chu ni nga chhungin Organising Secretary hnenah rawtna an siamte thehlut turin an ti a ni. Mizo infiamna (indigenous game) ngaih pawimawh turin an rél bawk.

Meeting-ah hian sorkar department hrang hrang te, sorkarin a pawm sport association hruaitute leh tlawmngai pawl hruaitute an tel a ni.



Share this Post

Login to comment
No Comments