Ramri venhimna tihkhauh a ngai - NPP

National People’s Party (NPP), Mizoram State Unit chuan thuchhuah siam­in, Assam sorkarin August 31, 2019-a National Register of Citizens (NRC) final list a tihchhuah tâk avangin ramrî-ah venhimna nasa lehzuala tihkhauh a pawimawh thu an tarlang.

NPP chuan, Assam state NRC final list-a chuang lo mi nuai 19-te'n ṭhenawm state-ah luh rûk an tum ngei dawn nia sawiin, "Ṭhenawm state dangte pawh an invéng lâwk nasa hle. Mizoram pawh hian nasa zawkin an lo luhna tur danna atan hma kan lak thuai a ngai a ni. Kan police-te pawhin checkgate tinah ILP temporary permit pek dawnin NRC an enfiah hmasa mek tih hriat a ni a, a lawmawm hle," an ti.

Mizoram NPP chuan, police checkgate awmnaah kher ni lo, ramri luhna remcháng dang awmnaahte pawh NRC list-a tel lo Mizorama luh tumte dan dan tur sorkarin a ruahhman thuai a ṭul thu a tarlang a; NRC-a tel lote'n Mizoram an chîm buai hmain invéng lâwk a, hma la thuai turin Mizoram sorkar an phût a ni.



Share this Post

Login to comment
No Comments