Maimaw pangang Rs. 4,131,522 man leisak tawh

Sericulture department chuan silk siam chhuahna tura khaw hrang hranga pangang khawitute hnen aṭangin kumin April-August inkar chhung khan Rs. 4,131,522 man an leisak tawh. Mimala hralh tam ber Laltlanzara, Lunglei Zo­tlang chuan a hralhnaah Mizoram record a siam turah an ngai.

Central Silk Board, Ministry of Textile hnuaia Research Extension Centre, Ai­zawla scientist- Dr Lalthlamuana Pa­chuau chuan, maimaw pangang khawi chu kut hnathawktute khai chhuahna zing­ah a ṭha ber pawl niin a sawi a; Sericulture department hotute pawhin Mizorama chhung­kaw 5,000 chuangin maimaw pangang khawi turin hma an la tawh a, hma an sawn zel tih Vanglaini an hrilh.

Dr Lalthlamuana Pachuau chuan, maimaw pangang chu India hmarchhak bialah chauh a khawi theih nia sawiin, "A hralhna lamah harsatna a awm lo. Mizorama kut hnathawktute khai chhuah nan a ṭha ber kan ti ngam lo nã a, a ṭha pangaah chuan a tel chiang. Pu Laltlanzara hian thla khat chhungin Rs. 3,00,000 man a thar ngei dawn tih a chiang tawh a, Mizoram tan record thar a ni ang," a ti.

Sericulture joint director C Rozawna chuan, maimaw pangang chi li - Mulbery (thingtheihmu ei chi) te, Eri (muṭih leh changkhen ei chi) te, Muga (nauthak leh búl ei chi)-te leh Oaksatar (sasua hnah ei chi)-teah hma an la tih a sawi a, "Oaksatar chu hmun zo deuh a ngaih avangin Champhai chhehvelah chauh an khawi," tiin, a dang pathum pawh Siaha leh Lawngtlai tih loh district dang zawngah hmalak a nih thu a sawi.

Sericulture department hotute sawi danin, maimaw pangang khawia eizawng­ tur chuan an chaw tur (ei tur) phun hmasak a ngai. Búl leh nauthak chu kum thum chhungin a puitling a, thingtheihmu chu kum khatah a puitling thung. Mai­maw pangang notê an lâk aṭanga a cocoon thleng tur chuan thla khat vel a ngai a, kum khatah vawi nga vel an khawi nawn hman a ni.

Muga pangangte chuan chawa an rin thing hnah an ei zawhah leiah an chhuk a, a man khawmna bik siamin thing dangah an sawn leh ṭhin. Thla khata thar theih a nih avangin hlawhchham palh pawhin a rei lo a, hma thar lak leh zung zung theih a ni.

Laltlanzara chuan, pangang khawi chu thingtlang mite eizawn nan a ṭha hlea a hriat thu sawiin, "A hun a rei lo. Mahse, thla khat chhung chuan âtchilh a ngai. State dangah an tih theih tawh loh avang­in cocoon man pawh a sang zel turah ka ngai a, market lamah harsatna a awm lo," a ti a; a beih tak tak lai chuan zingah dar 4:30-ahte a tho a, taimak ngai tak a nih thu a sawi.

Lalthanzara sawi danin, pangangte chu nipuiah ni 28 hnuah an cocoon (tui) a, thlasikah ni 45-50 velah a cocoon 

ṭhin. Kum 2012-ah bul a ṭan a, nauthakpui kûng 800 vel leh búl kûng 500 vel a nei. Sericulture department-in cocoon 50,000 an leisak dawn a, a dang chu Assam-in an leisak dawn.

District hrang hrang aṭangin maimaw pangang cocoon Sericulture department-ah hralh mek a ni a, tun hnai têa hralh tam zual zingah Lalchharliana, Darlung chuan kg. 98 a thar a, kg. khat Rs. 380-a hralhin, Rs. 37,240 man a ni. Lalruat­kima, Saitual chuan kg. 74.5 a hralh a, Rs. 28,310 man a ni a; Children Home Genesaret, Champhai chuan ni 29 chhung­a an khawi puitlin aṭangin Rs. 13,575 man an hralh bawk.

Sericulture joint director C Rozawna chuan, silk siamna atana maimaw pangang khawi chu thil rei lo ni mah se, a awlsam lutuk bik lo tih a sawi a; tuna Mizorama inziak lut chhungkaw 5,000 aṭangin chhungkaw 3,500 vel chuan an tih tak tak thu leh a dang chuan an ti ṭha tâwk lo tih a sawi.

C Rozawna sawi danin, Sericulture department chuan Aspirational District - Mamit district-a khaw 15-ah chhungkaw 500 huam turin hma an la leh mek a, chuta tan chuan Central Silk Board-in cheng vbc. 11 an rawn pe tawh. Siaha district-a chhungkaw 500 tan Central Silk Board-in project cheng vbc. 12 man a pawm tawh bawk.



Share this Post

Login to comment
No Comments