No. 1-ah Ocean Avenue 'Lalpaah lawm la'

Zote Honda Ṭhazual Fakna chart-ah Ocean Avenue 'Lalpaah lawm la' tluk thei an awm lo a, anni hi thlan hlawh ber an ni. Esther Khiangte pawhin hma sawn zelin 'An eng reng ang' tih hla hmangin pahnihna dinhmun a rawn luah a, The Prophets 'Mangang Authawm' chu pathumna a ni thung.

Chart-a mikhual lo Ocean Avenue 

Ocean Avenue-te hian an hla hit 'Lalpaah lawm la' tih hmang hian hun rei tak ata tawh Ṭhazual Fakna Chart hi an luahlum tawh a, an music video tlangzarh a nih hnu lawk aṭangin Chart-ah hian an lang nghal a ni.

An dinhmun an sawh nghet chho zel a, hma an sawn thu leh thlan an hlawh thu kan ziahlan fo tawh hnuah, tunah chuan dinhmun sang berah an rawn invawrh thei ta hial a, mipuiin an hlutzia a langchiang hle.

'Lalpaah lawm la' tih hi hla thar a ni lo a, Kristian hlabuah pawh a awm, kum tam tak liam tawha J McGranahan phuah a ni. Ocean Avenue-te hian music mawi taka arrange-in an rawn thar thawh leh a ni a, ṭhalaite mai piah lamah kum upa lamte pawhin an hriat tak hla a nih avang hian thlan an hlawh zual hle nite pawhin a lang.

Video hi I SHOT BLANKS kutchhuak a ni a, recording hi Eric Renza Sword tune records-ah an ti thung a ni.

An beisei aiin an hla a 'hit'

Eric chuan Ṭhazual top 10-a an lang chu an beisei phak bak a nih thu a sawi. "Video siamin kan theih ang tawk ti veah kan inngai a, video neih hrim hrim pawh hi kan lawm tawk viau tawh. Pathian vang liau liau a ni," tiin Vanglaini a hrilh.

Ocean Avenue-te hi KTP Kulikawn Branch beat contest aṭanga indin an ni a, an vocalist hi R. Lalawmpuii, lead guitarist Lalnunhlua, rythm guitarist Eric Zothansanga, bassist Lalrintluanga leh drummer Lalthanfela-te an ni.

Esther Khiangte leh The Prophets an che ṭha

Esther Khiangte 'An eng reng ang' chu palina aṭangin pahnihnaah a rawn invawrh a, ngaithlatuten an hlut tih a hriat. Hetihrual hian chart hmasaa pangana The Prophets  'Mangang Authawm' chu pathumnaah a rawn invawrh ve bawk. Anni pahnih hian hma an rawn sawn zel a, chart tihchhuah leh huna an dinhmun tur hriat a chakawm tawh hle.

Palinaah hian chart hmasaa pakhatna Malsawmdawngkimi 'A lo kal thuai dawn' chu a awm ve thung a, Ruthi CVL Muanpuii 'Bible' chu pangana a ni bawk.

ZOTE HONDA ṬHAZUAL FAKNA TOP 10

1Ocean AvenueLalpaah lawm la

2Esther KhiangteAn eng reng ang

3The ProphetsMangang Authawm

4MalsawmdawngkimiA lo kal thuai dawn

5Ruthi CVL MuanpuiiBible

6ThawhlehnaniropuiaI tan ka hlan e

7AmteaLunghlu 

8Lalnunhlua ChhakchhuakKross lerah 

9Lalremruati (Naemi)Intlansiakna

10Lalrampari KhiangtePa a lungawi tawh si 



Share this Post

Login to comment
No Comments