Spider-man: Far From Home Khum thei la awm lo

Kar tawp Box Office-ah thil inthlak danglam lian tak a awm lem lo a, roreltu ngai  Spider-man: Far From Home chuan ro a rel leh. Pahnihnaah pawh chart hmasa lama pahnihna tho Toy Story 4 chu a awm leh bawk a, anni pahnih tluk thei hi kar hnih chhungin an la awm lo a ni.

Spider-man: Far From Home 

Marvel Cinematic Universe ropuina belhchhahtu Spider-man: Far From Home hian belchian a dawl viau ni tur a ni, kar hnih zet a liam hnuah pawhin kar tawp US Box Office-ah khan Theatre 4,634 

aṭangin $45,353,359 a lalut hem mai. 

Khawvel puma a sum lakluh phei chu USD mtd. 850 a hnaih thuak a, Spider-Man movie siam tawh zawng zawnga sum lalut hnem ber a ni ta. Tobey Maguire-a Spider-Man 3 khan USD mtd. 555 vel a lalut a, Far From Home hian hei hi a rawn khum ta a ni.

He film hi movie review tute pawhin an fak hle a, Homecoming aia hmuhnawm ti zawktu pawh an awm nual. 

Toy Story 4 hnungtawlh thei lo

Disney leh Pixar film Toy Story 4 hi naupang film anga ngaih mah ni se a ropuina a nep phah lo khawp mai.

Kar hnih chhung zet chart-ah a chungnungber a, chumi hnuah kar hnih chhung zet pahnihna a ni leh thei a; mipuiin an la hlut hle tih a hriat. Tunkar tawpah pawh khan US-ah chuan USD mtd. 20.9 chuang zet a la lalut thei a ni. Khawvel puma a sum lakluh tawh zawng zawng phei chu  USD mtd. 771 vel a ni tawha chhut a ni a, en a la hlawh cher cher hle. 

Henglaiah hi chuan naupang en tura kan dah ngawt ṭhin ni mah se khawthlang lamah khu chuan heng computer animated film hian hlut an hlawh ṭhin hle. Toy Story movie zawng zawng pawh hi an la hlawhtling em em vek a ni. Toy Story 4-ah pawh hian aw thawhtu zingah Tom Hanks, Keanu Reeves, Tim Allen leh Annie Potts-te an ni nawk hlawm a ni.

Movie thar pahnih 

an che ṭha thawkhat

US Box Office chart top 10-ah hmel thar pahnih hmuh tur a awm a, chungte chu Crawl leh Stuber-te an ni.

Paramount Pictures film Crawl hi a hmuhnawm hle tura ngaih a ni a, social media lamah leh internet lamah pawh thehlar tum hle mah se, Spider-Man: Far From Home leh Toy Story 4 nekchhuak thei tur khawp chuan a la lian tawk lo a ni ange. Chutiang chu ni mah se kar tawp Box Office-ah pathumna a ni phak tho. Trailer aṭang chuan phut zuk zukna tur a tam hle tih a hriat a, awle hlauhawm tak che vel hi hmuhnawm titu pawh an tam hle.

Palinaah hian American action comedy film Stuber, Michael Dowse direct chu a awm thung a ni.

Box Office top 10-ah hian Crawl leh Stuber bak hi chu movie thar lang phak an awm lo a, chart hmasaa pathumna Yesterday chu pangnaah an tla thla a, Aladdin(2019) pawh pangana aṭangin paruknaah an tlahniam bawk.

Annabelle Comes Home chu chart hmasaah khan palina ni mah se kar liam ta kartawpah kha chuan pasarihnaah a tlahniam dawrh bawk a, Midsommar chu pariatnaah a awm bawk a ni.

Pakuanaah The Secret Life of Pets 2 a awm a, Men in Black International chuan top 10 hi a khar thung.

Avengers: Endgame pawh hun rei tak chhung US Box Office top 10-a luahlumtu a nih hnuah top 10-ah hian a lang phak ta bik lo a, mahse 11-naah a la awm tho a ni. Record tam tak siam tawhtu Endgame hian khawvela film hlawhtling ber nih tumin Avatar a um mek a, mi tam tak chuan a umphak ngei pawh an ring hle a ni.

Box Office Top 10

1Spider-Man: Far from Home$mtd. 45.3

2Toy Story 4$mtd. 20.9

3Crawl$mtd. 12

4Stuber$mtd. 8.2

5Yesterday$mtd. 6.7

6Aladdin(2019)$mtd. 6.1

7Annabelle Comes Home$mtd. 5.6

8Midsommar$mtd. 3.6

9The Secret Life of Pets 2$mtd. 3.2

10Men in Black International$mtd. 2.2



Share this Post

Login to comment
No Comments