ZOTE HONDA ṬHAZUAL LENGZEM Josephine Lalawmpuii a chungnung ber

Josephine Lalawmpuii chuan a hla thar 'Khep khep maia' tih chu hlawhtlinpui zelin, Zote Honda Ṭhazual Lengzem-ah dinhmun sang ber a thlenpui a, chart hmasa lamah pathumna ni mah se tun ṭumah chuan tluk zo an awm ta lo.

Pahnihnaah hian chart hmasa lama dinhmun sang ber luahtu Zorinzuali 'Ka rawn hlan' tih chu a awm ve thung a, David Lalremruata chuan a hla 'Nuimawite' tih chu pathumnaah a rawn inhlankai pui ve leh bawk.

Josephine-i'n a hla thar a thlawh fuh khep khep

Josephine-i hla thar dangdai tak leh beng fah tak mai 'Khep khep maia' tih hla hi ṭhalaite rilrem zawng tak hla a ni a, a satuin a sa thiam bawk a, chart-a dinhmun ṭha ber a rawn luah hi thil mak a ni hran lo.

He hla hi Myztic Sailo phuah a ni a, music video hmuhnawm tak mai direct tu pawh hi amah tho hi a ni. A music video hi a hmuhnawm dangdaiin, Josephine-i a zei bawka en a manhla hle.

He hlaah hian YouTube lama comedian hriat hlawh tak, Kapi, Kungi leh Hrangi-ten an pui bawk a, video-ah pawh hian an inlan a; video ti hmuhnawm tu tak pawh an ni. Music hi Foster Recording Studio kutchhuak a ni a, Nunzemawia siam a ni thung.

Chart hmasa lamah pathum­na ni mah se kar hnih chhung lekin pakhatnaah a inhlangkai thei hian thlan a hlawh zia leh mipuiin duhzawng tak a ni tih a tilang. YouTube lamah pawh viewer nuai 6.2 chuang a nei tawh a ni.

Zorinzuali Khiangte bawk

Ṭhazual chart-a mikhual lo tak Zorinzuali chuan chart hmasaa pakhatna a nihpui 'Ka rawn hlan e' tih chu pahnihna a nihpui thung. He hla pawh hi Myztic sailo hla phuah bawk a ni a, a ni hian a thawh hlawk hle a ni.

Zorinzuali Khiangte hian hla thar a tihchhuah apiangin chart-ah dinhmun sang tak a thlenpui deuh ziah thei a, hei hian a zaithiam zia leh mipui ngainat zawng hla a thlan thiam zia a tilang chiang hle awm e.

Pathumnaah hian 'Jerusha' tih hla hmanga min lo awi tawhtu David Lalremruata hla 'Nuimawite' tih chu a awm ve thung. Chart hmasa lama palina kha a dinhmun a rawn ṭha hret a, hma a sawn hret hret zel bawk a, eng chen nge a thlen dawn tih chu hriat chakawm tawh tak a ni.

Priscilla Fanai 'Ka duh leh duh loh' tih chuan hma a rawn sawn dawrh bawk. Chart hmasaah khan pariatna a ni a, tun ṭumah erawh palina a rawn ni dawrh mai a ni. He hla mawi tak hian hma a sawn zel a rinawm. Chutih rualin top 5-ah hian Jenny Jathang bawkin a rawn khar leh a, a hla 'Nang nen' tih hmangin pangana dinhmun a hauh a ni.

Paruknaah hian Seraphic Choir 'Medley' a awm a, pasarih­­na dinhmun luahtu chu HT Lal­thanzami 'Di rialin' tih a ni thung.

Chart hmasa 

lama lang lo pathum

Pariatna dinhmun luahtu hi Chama Thangluah 'Khawiah nge i ṭuan le' tih a ni a, pa­kuanaah hian Laltha 'Ka thlang ber che' tih a awm thung. Tma Chhangte chuan 'Tawn leh che ka nuam (Lasi)' tih hla hmangin top 10 a rawn khar.

Heng hla pathumte hi chart hmasa lama top 10 kai phak lo ṭhah an ni a, tun ṭumah erawh Ṭhazual chart-ah dinhmun sang tak an rawn luah chho a ni a, eng nge an an zel dawn tih chu hriat a chakawm tawh hle a ni.



Share this Post

Login to comment
No Comments