Hospital aṭangin Demi Lovato a chhuak Rehab-ah a lut nghal

Ruihhlo tih nasat luat avanga ni khaw hre loa awm American singer Demi Lovato chuan ṭhat lam panin hospital a chhuahsan tawh a, rehab-ah a lut zui nghal. 

Demi hi July 24 khan nikhaw hreloa a awm hmuh a ni a, a hnuah heroin overdose tih hriat a ni. Cedars-Sinai Medical Center, Los Angeles-ah dahluh nghal a ni a, Inrinni khan a chhuak a ni. Hospital aṭang hian chhuak tawh mah se, inenkawlna ṭha bik a la mamawh avangin rehab a bel leh nghal a ni. Rehab center-ah hian ni 30 vel a awm dawn a ni. 

A chhungkhat laina hnai te chuan Demi nunna hi chhan hman a ni lo ṭep tih an sawi a, hospital-ah pawh hian mu leh mal nei loin hun rei tak awm tih an sawi. Chutih rual chuan duhsakna an dawn avangin lawmthu an sawi a, a ṭhat chho zel an beisei thu an sawi bawk. 

Demi hi July 24 hnua a vawi khat nan Pathianni khan social media lamah thu a post a, ruihhlo bawih aṭanga chhuak tura a beih tur thu a sawi. Kum 25 mi chuan, "Ruihhlo avangin hun khirh tak ka tawng a, hneh tumin ka bei mek a ni. In thlawpna ka mamawh reng dawn a ni," tiin a sawi. 'Sober' singer hian ruihhlo bawih aṭanga chhuak tura beih tur thu a sawi uar hle a ni. 



Share this Post

Login to comment
No Comments