Mizo Idol 2018 Kolasib District aṭangin mi 20 an tling Zaninah Aizawl Audition chhunzawm dawn

Mizo Idol 2018 chuan ngaihven a hlawh chho zel a, intihsiakna boruak pawh a sang sawt viau bawk. District Autition result hnuhung ber chu nizan khan puan a ni a, Kolasib aṭangin mi 20-in second round an lut a ni. 

Thawhlehni zan aṭang khan Aizawl-ah audition hi neih ṭan ve leh a ni a, zaninah chhunzawm a ni ang. Zanin hian mi 40 an inlan dawn a, naktuk zanah chhunzawm leh a ni bawk ang.

Kolasib an thiam

August 4 khan Kolasib Audition hi neih a ni a, contestant 50 an awm. Intihsiak hmachhawn zinga mi 20 te chuan second round an lut a, District Audition neih tawha tling tamna ber a ni. 

Audition hi District paruk - Champhai, Serchhip, Lunglei, Lawngtlai, Siaha leh Kolasib-ah zawhfel a ni tawh a, Aizawl-ah neih leh mek a ni. Kolasib (20), Lawngtlai (17) leh Lunglei (15) te chu audition paltlang tamna an ni. 

Hetih lai hian Aizawl Audition-ah tel an ṭhahnem ber a, mi 344 zet an inlan dawn. Engzatinin nge audition paltlang thei dawn tih chu August thla lai hawlah chuan a hriat tawh dawn a ni. 

Mizo Idol Season 6-ah hian tel tuma hming pe lut zawng zawng chu mi 597 an ni a, tel an ṭhahnem hle. Kum dang ang bawkin a boruak a lian leh dawn a, Idol nih tum an tam avangin intihsiak pawh a hauhtak leh hle dawn a ni. 

Lawmman lam hi

Zonet chhungkua chuan kumin Idol thlannaah hian lawmman ṭha tak an buatsaih dawn a, kum dang zawng aiin tel a man hla dawn a ni. Mizo Idol 2018 atana thlan chhuah hnenah Rs. 1,50,000 hlan a ni dawn a, scooter a la dawng dawn cheu bawk. Pahnihna hnehah Rs. 80,000 hlan a ni dawn a, pathumna pawhin Rs. 50,000 a dawng bawk ang.

Top 5 chin ten Rs. 15,000 ṭheuh an dawng dawn a, top 10-a lang pa chin te pawhin Rs. 10,000 an dawn dawn bawk a ni. 



Share this Post

Login to comment
No Comments