Kesha-i'n album a la buaipui thei lo

‘Tik Tok’ hmanga khawvel rimawi dawhsâna zaithiam langsara rawn invawrh Kesha hi a la buai hle a, album lam pawh a la ngaihtuah hlei thei. A producer ṭhin, Dr. Luke nena an thubuai a la kal reng a, chu mai bakah, hman deuh khan a nunah harsatna dang a nei bawk.

Mahni inrinhlelhna te, mahni inrintawkna te a neih loh ṭhin avangin a buai ṭhin hle a, chu mai bakah chaw ei mumal a nei mang lo a, a taksa pawh a chhia a, rehab-a a luh a ngaih phah hial a nih kha. Tunah chuan khatiang, a nuna harsatna te a kha a kalsan tawh a, amaherawhchu buaina la tihfel loh tam tak a la neih avangin music album lam chu a la hla deuh ang.

A producer Dr. Luke nen an thubuai hrang hrang an nei a, a producer hian a rilru a tina hle ṭhin tih sawiin, mipat hmeichhiatna lam hawi zawngin a chungah harsatna a thlen ṭhin tih a sawi a, court-ah a kal. Hengte avang hian court hnenah Kemosabe Records-a contract a neih lai chu titawp turin ngenna a thlen a, mahse nikum June thla kha New Court City court chuan he thubuai hi a titawp.

Kum 2012-a a album pahnihna ‘Warrior’ a tihchhuah hnu kha chuan album lam a la hawi thei lo. Hla erawh a ngah tawh a, hla 80 vel zet a record tawh a, Dr. Luke nena an inkar buai chungchang pawh hi hlain a phuah nghe nghe. Kesha-i’n a sawi dan chuan Dr. Luke hian music tichhuak tawh rih lo turin a dang tlat.



Share this Post

Login to comment
No Comments