Back in Black 40th Anniversary pualin AC/DC-in merchandise thar tlangzarh

Thil reng rengah hian a 'ber' sawi hi a har viau ṭhin, 'ber pawl' huanga dah erawh kan ngah viauin a rinawm. Rock music tuipui leh guitar lam tuite zinga 'guitar riff' lar ber pawlah erawh Australian rock band AC/DC-in kum 1980-a an album tlangzarh Back in Black title hla Back in Black opening guitar riff hi chu a tel ngei e.

July 25, 1980 khan AC/DC chuan Back in Black album hi an tlangzarh a, kum 40 a tlin lawmna atan hian 'merchandise' thar an tlangzarh a ni. 

Back in Black hi an studio album pasarihna a ni a, an vocalist Bon Scott tel loa an album hmasa ber a ni a, Brian Johnson-a'n AC/DC a zawm hnua an album hmasa ber a ni thung.

He album-ah hian vawiin thlenga khawvela hla lar 'Shoot to thrill', 'You Shook Me All Night Long' leh 'Back in Black'-te awmna album a ni a, rock music khawvelah chuan album hlu tak a ni a, a hunlai khan a hit hle a, khawvel pumah copy maktaduai 50 lai zu han hralh a!

October 1980 khan a vawi khatna turin platinum album-ah puan a ni a, December 2007 khan a vawi 22-na atan platinum certify leh a ni. Recording Industry Association of America (RIAA) chuan khawvela album hralh ṭhat ber palinaah a puang hial a, nikum December khan vawi 25-na atan platinum certify-a puan a ni leh.

Mak ve deuh chu hetiang khawpa album hlawhtling ni si hi Billboard album chart-ah No.4 aia sang a thleng thei miah lo! 

"He album hi AC/DC hre tawhte'n an pawm thei dawn em tih kan hre lo. Brian hi an pawm ang em? Amahah pawh pressure a tam hle a. Mahse puitlin erawh kan tum tlat thung," tiin guitarist Angus Young chuan Back in Black album chungchang hi a lo sawi tawh a, chan loh khanah sang tak an thlenpui niin a lang.

Opening riff lar zia a chungah kan tarlang tawh a, hei chiah hi a lar chhan a ni lo. AC/DC vocalist duhlai fam ta Bon Scott puala an hla tihchhuah a ni tlat. Khawvelin AC/DC a hre lar tawh a, Bon Scott a thih avangin engtin nge an kal zel dawn tih an hre chak. 

Australian rock band hian English singer Brian Johnson an member-ah an la thar a, eng ang chiah nge a nih dawn miin an hre chak bawk. Guitar riff nalh zeta Angus Young-a'n a perh hnua Johnson-a'n guitar riff ṭang tluk zeta ṭanga 'Back in Black, I hit the sack' tia a rawn zai hian rock music ngainatute beng a fah a, guitar riff leh vocals inkawp rem ber pawl hla a ni awm e.

"Ka band mate tharte khan hla phuah turin min ti a, hla mawihnai tak ni lo pawh ni rawh se, Bon-a tan a ni tur a ni, tiin min hrilh. Ka rilrua lo lang ka ziak chhuak a, 'Nine lives. Cats eyes. Abusing every one of them and running wild'. Ka ṭhiante chuan ṭha an ti a ni. A hla thuah khan Bon-a nun an hmu tlat a ni," tiin Mojo magazine-in an kawmnaah a sawi a ni.

•    Khawvela album hralh khal ber zinga mi a ni.

•    AC/DC studio album pasarihna.

•    Bon Scott thih hnua an album hmasa ber.

•    Kum 2012 khan Recording Academy Grammy Hall Of Fame collection-ah telh a ni.