Hindu Kush-Himalaya vur tuiralin India leh a chhehvel a nghawng

Thlasik a inṭan nachungin thlasik a tawi tual tual avangin vur khanga innghat lui leh leihnuaia tui ringte tan chuan hun a duhawm lo tial tial thung. Hindu Kush leh Himalaya tlanga vur a tuiral chak tial tial a, vur tla a tlem tial tial bawkin hemi ring lui tui­te tan chuan a thlaphan thlak tial tial.

Kathmandu-a in­nghat, International Centre for Integrated Mountain Development (ICIMOD)-a mi pahnih - Anjali Prakash leh Arun B. Shrestha te chuan Hindu Kush tlang leh Himalaya tlanga vur awm dan an zir chiannaah heng hmuna vur khâwn lui (glacier)-ah vur a tlem tial tial a ni an ti. Hei hian a nghawng tur chu Indus lui tui a tlem tial tial ang a, Ganga leh Brahmaputra luite pawh a tuar nasa tur an ni ang. Chu mai bakah India hmar lam phaizawla lei chhunga rila tui awmten a tlem phah dawn a ni.

Hetianga vur khâwn lui a tui nasat tial tial chhan hi sik leh sa inthlak danglam chak tak avanga ruah leh vur tla danglam nasa ta avangte a ni a, hei hian mi maktaduai tam tak tui in tur leh hman tur a nghawng dawn a ni.

Tun aṭanga kum 20 vel lo kal leh turah chuan lei hnuaia tui awm a tlem belh ang a, heng tlanga vur khâwnin a chawm luite a kang nasa ang a, chu chuan mihring tui hman tur mai bakah loneih thlengin a nghawng dawn a ni. Hindu Kush-a vur khâwn lui awm zinga a tam ber hi chu a kiam tial tial.

Hindu Kush leh Himalaya chhehvela lei hnuai tui hnar ber chu vur khâwn khang, a tâwk chauha tuiralah a ni. Ramngaw a cheureu nasat tawh avangin ruah sur mah se, ruahtui hian lei hnuai a thleng hman tak tak lo a, a luangral zel a ni. Hei vang hian heng lai ramte hian tui lamah harsatna an tawk thuai ang an ti.



Share this Post

Login to comment
No Comments