Mizo film chhuak thar tur 'NORAH'

Mizo film industry hma­sawnna chuan rah duhawm a chhuah chho mek zel a, tun hnaiah pawh film chhuak thar ṭha tak tak hmuh tur a awm ta nual mai. Hetiang a nih mek lai hian Leitlang Pictures an rawn lang leh ta a, nakkum March thla vela tlangzarh turin 'NORAH' film an buaipui mek a ni.

Mizo filmmaker zinga hriat hlawh ber tih ngam Mapuia Chawngthu chuan he film hi a direct dawn a, ani hi Mizo film lar tak - Khawnglung Run leh Nunna Thar siamtu kha kha a ni.

A kalphung tur chu...

'NORAH' film hi Mizo film dang te nen a inpersan viau dawn a nih hmel a, Mizo Society nena inlai chin tak tur si a ni. Romantic Comedy rawngkai, tunlai politics boruak nen pawha inmil tak si a ni dawn. Hmangaihna lama tuipui tak takte tan leh comedy rawngkai ngaina deuh tan chuan hmaih chi a ni lo ang. He film hi nau­pang, ṭhalai leh kum lama upa zawkte tan pawha en chakawm tur tak a ni.

A script ziaktu hi Mimi Lalnunfeli a ni a, ani hi Mizo film industry-ah a mikhual lo hle a- 'Anabaino' leh 'Thingtlang Tlangval'-ahte pawh a sulsutu zingah a lo ṭang tawh a ni.

A changtu lam hi...

He film-a chang tur te hi uluk taka thlan chhuah an ni a, kan lo hmuh fo tawh leh hmelhriatsa an awm nuk dawn. Mizo model zinga hriat hlawh ber te zinga mi Zothankimi Ralte (Kimkimi) chu he film-ah hian kan hmu dawn a, hei ngawt pawh hi en tichakawm zualtu a ni.

'NORAH' film-ah hian Awmpui thinchhia tia kan hriat lar Siamtea pawh ama signature dress nen ngei mai a inlan dawn a, Papuia Pachuau a la awm cheu bawk.

He film hi Joseph (CK Hyundai) chuan a produce dawn a, costume designer and stylish hi Numami (Magic 'N') a ni thung dawn a ni. Shooting ṭan a ni tawh a, kumin chhunga zawh hman tum a ni. Ruahman dan chuan nakkum March thla-ah tlangzarh a ni ang.