Hozier hla avangin pastor-in lehkha a thawn

'Take me to the church' hla hmangin khawvelin a hria a, a hlawhtlinpui. He hla avang vêk hian Hozier, a hming tak, Andrew Hozier chu pastor pakhat Rick McDaniel chuan lehkha a thawn.

Pastor Rick McDaniel hian Hozier hla, Take Me To The Church a ngaihthlak chungchang a tarlang a, nalh a ti a, a thlûk, music arrangement te a duhzawng tak a ni tih hrilhin, a hla thu erawh sawiselin, a la naupang a, a la hre tak tak lo nia sawiin, a Irish-pui, Bono erawh chuan kohhran leh Kristianna chu Hozier thlir loh dan hlirin a thlir thung niin a sawi bawk.

"An kawmnaah che Catholic Kohhran i thlir dan a ṭha lo hle tih ka lo hria a, chu ai mah chuan Russia rama homosexual-te khuahkhirh zawnga an dan siam i helh lehzual hle tih ka hre bawk. (I hla thu anga) Kristianna zawng zawng khatianga thlir vek kha chu a dik lo thei hle. He hla hi phuah hian kum 22 mi chauh i. I Irish zaithiampui Bono erawh chuan kohhran leh Kristianna chungchangah i thlir loh dan daihin a thlir thung a, nang aiin hringnungah hian tawnhriat erawh a ngah viau zawk. Krista zuitu tak tak tawngin, chung mite nen chuan ti tiho ta ula, i rilru i thlak viau ka ring," tiin a ziak.

McDaniel chuan, "Russia rama an dân hman i duh loh viau a nih leh Russia ram sawiselna hla phuah zawk ta mai che," tiin a ziak bawk.

"Kohhran leh Kristianna i dodalna chhan ber bia lang chu sex hman khawloh an duh loh vang niin alang...uirena, ruahmanna awm loa nau pai leh natnate a thlen a, hei hian nun a tibuai a, a tikhawlo a ni. Kohhran chuan sex hi Pathianin mihringte min pek niin a ngai a, Pathian thlirna aṭanga sex hi thlir i mamawh hle niin ka hria," a ti.

"Kohhran chu mi tih dan lo judge a, lo endik hrat angin i ngai a, mahse sex chungchanga thu dik hi puan chhuah a ngai si a nih hi. Bible chu a ṭha leh ṭha lo, a dik leh dik lo, thudik leh dawt hre hrang turin min zirtir a ni. Kohhran hian mite a ṭha lam kawnga hruai turin mawhphurhna a nei a, chutah chuan mite an kalna kawng dik lo lo kawhhmuh kha a thiang a ni. I duh ang ang hla phuah thei turin zalênna i nei a, kei pawhin i ngaihtuahna leh i hla thute sawisel turin zalênna ka nei vein ka inhria," tia chhângin, McDaniel hian Kristian inzirtirna ṭha tak takte chu hre chianga en turin Hozier hi a sawm a ni.

'Take me to the church' hla hi US-ah ringawt hian copy maktaduai 3 vel hralh a ni tawh a, UK-ah nuai ruk leh Australia leh Germany-ah te nuai hnih chuang ve ve a hralh a ni. Lehkhathawntu Pastor Rick McDaniel hi  Var­ginia Richmond-a Richmond Community Church pastor a ni.


Share this Post

Login to comment
No Comments