Belhchian dawl Triau Trackx
Nikum kumtawp lam khan Zonet Cable-in Mizo Idol thlanna a ṭan a, mipuite'n ngaihven a hlawhin, ṭhalaite titi a tling a ni. He hun hi Mizoram rimawi khawvelah, Mizo Idol-a inlan ve lo tan chuan  dingchhuah nan hun khirh tak ti ila kan sawisual tam lutukin a rinawm loh!  

He hunah hian Champhai musician rual inzawmkhawm, Triau Trackx chuan an music video '2 leh 4' tichhuakin Zoram rimawi khawvelah seat ṭha an rawn luah nghal a, an rimawi dangdai leh ngaihnobei tak kara Naupang Kawlhrawng leh Marshall FK-a thuchhamte chu ṭhalaite intihtleina ber pakhat a ni a, a la ni zel dawn niin a lang. 

Triau Trackx hian tunhnai khan Music video thar an tichhuak a, chu chu introduce hranpa ngailoa ṭhalaite hriatchian leh tawh a ni. 'Ka lo nghak reng che' video hi February 19 khan YouTube-ah dah a ni a, kar khat lek chhungin entu 11,355 a nei der tawh a, social media kan hman lar Facebook-ah pawh a fakna thu kan hmu bang lo a ni. He video-ah hian Naupang Kawlhrawng leh Marshall FK-a te an awl ve thung a, Champhai, Kahrawt veng nula, Lalruatfeli an zaipui ve thung a ni. 

'Ka lo nghak reng ang che' tih hi Triau Trackx drummer Ramengmawia phuah a ni a, video hi Gabriel Graphix, Muantea kutchhuak a ni.  

Triau Trackz-a an rapper Naupang Kawlhrawng (Kim Kima) chuan, 'Ka lo nghak reng ang che' video chu a beisei phak baka a hit thu a sawi a, Triau Tracks chu band emaw group emaw anga kal loa project a nih angin project an neihahte an thawhho vek ṭhin thu a sawi. 

Kim Kima hian nikum December 30 khan Youtube-ah single thar, 'I hla' video chu a lo tichhuak leh tawh bawk a, tunah hian single thar, Wow Wow (vei ding vei) a buaipui mek thu sawiin, March tla tawp lam chuan peihfel hman a rinthu a sawi. 

Kim Kima single Wow Wow (vei ding vei) bakah hian Triau Trackx chuan Zirtawp Zan tihchhuah tumin an inbuatsaih leh mek bawk a, April a tihchhuah hman tumin, Champhai Cable Network neitupa leh Triau Trackx te video produce sak ṭhintu Mama Pachuau chuan video senso a tum sak dawn a, Champhai kutchhuaka music video hautak leh pui ber ni turin hma an la mek a ni. 

'Zirtawp Zan' ah hian Naupang Kawlhrawng leh Marshall FK-a te pawh an inlan leh dawn a, a hla thu hi a huhoa an phuah niin, recording erawh an la ṭan lo a, tunah hian exam laite a nih avangin duh angin hma an lak chak theih loh thu Kim Kima chuan a sawi.


Share this Post

Login to comment
No Comments