CMT Music Awards 2015: Carrie Underwood a che ṭha tluang zel

12th June, 2015

United States-a country music fans te vote hmanga country music video ṭha thlanna, CMT Music Awards 2015 chu nimin (US rama Nilaini zan) khan Nashville, Tennessee-a Bridgestone Arena-ah sem a ni a, kum 2005-a American idol-a pakhatna latu, Carrie Underwood a che ṭha hle.

Carrie hian a music video “Something in the Water” hmangin Video of the Year leh Female Video of the Year awards a la a, Miranda Lambert nena an siamdun, “Somethin’ Bad” music video hmangin Collaborative Video of the Year award a la bawk.

Kum ruk kalta chhungah tun ṭum hi Carrie-in CMT Music Awards-a Video of the Year chawimawina a lak vawi nga-na a ni. Kum 2007 khan "Before He Cheats" hmangin he chawimawina hi a lo dawng tawh a, kum 2010-ah "Cowboy Casanova" hmangin a dawng leh a, kum 2012-ah "Good Girl", 2013-ah "Blown Away", 2014-ah "See You Again" leh 2015-ah "Something in the Water" hmangin a zawnin vawi li a dawng a ni.

Carrie hian a pasal Mike Fisher nen kumin February 27 khan fapa, Isaiah an nei a, tun ṭuma award a dawn hi Isaiah pian hnua chawimawina a dawn hmasak ber a nih thu leh a fapa leh pasal chu a music career-a amah fuihphurtu an nih thu a sawi.

Kum 1967 khan 'Music City News Awards' tiin Music City News magazine chuan he awards hi a sem ṭan a, The Nashville Network (TNN) chuan fan te hmanga awards dawng tur thlanna, Viewers' Choice Awards buatsaih ve lehin, he awards pahnih hi kum 1990 khan TNN/Music City News Country Awards tiin chhunfin a ni.

Kum 1999-ah TNN leh Music City News magazine thawhdunna a tawp a, magazine pawh tihtawp a ni bawk. Hemi hnu hian Country Weekly chuan awards hi sem chhunzawmin, kum 2000 khan Country Weekly presents the TNN Music Awards tia sem a ni. Kum 2001-ah TNN chuan a hnuaia mi CMT chu awards buatsaih puiin, TNN/CMT Country Weekly Music Awards tia sem a ni a, kum 2002-ah TNN chuan awards a buaipui ṭhin chu chawlhsanin, CMT mawhphurhnaah a dah a, CMT Flameworthy Video Music Awards tia sem a ni. Kum 2005 aṭang khan tuna a hming CMT Music Awards tia sem ṭan a ni.