Thla 18 ruihhlo nghei tawh Mark Morton

Lamb of God guitarist Mark Morton chuan thla 18 lai ruihhlo tel loin hun a hmang ta a, hemi pual hian Twitter-ah post a siam.

"Vawiin hian, 100%-in ruih­hlo reng reng leh zu tel loin kum khat leh a chanve chu hun ka hmang ta a ni. Hei hi i chhiar  a niha, ruihhlo ngawlveinain i nun a tichhia a nih chuan, hei hi hria ang che, sim hi a theih a ni. Ruihhlo nghei tawh tu emaw zawng la a ṭanpuina dil ang che. Nun hi a nuam takzet a ni," tiin Inrinni khan a tweet.

Morton hian a hla 'All I had to Lose'-ah pawh a ruihhlo nghei chungchang hi a lo tarlang tawh a ni.

Khawthlang milar zingah chuan ruihhlo nghei an tam tawh hle a, an nun a hlim zawk thu leh nghei theih a nihzia hi uar takin an sawi fo ṭhin.

Thla tir lamah khan Metallica guitarist Kirk Hammett pawhin zu nghei nuam a tih thu a lo sawi tawh bawk. Zu a nghei hnuah a zu nghei hun hma aia kum 10 emaw 15 emawa hmaah a lo nghei zawk lo chu a inchhir tih a sawi hial a ni.



Share this Post

Login to comment
No Comments