Telegram-ah fee chawiin business account siam theih

Instant messaging service, Telegram messenger-ah user-te'n an personal account-a an hman mek chu monthly fee chawiin business account-ah an let thei tawh dawn tih Telegram founder Pavel Durov chuan a puang.

Telegram business acount-ah hian color label, automatic greetings/away message bakah quick reply shortcuts te a awm a, hei hi sumdawng leh dawr neite tan pawh a ṭangkai dawn hle a ni. Tun thla chhung hian business feature dang pawh siam belh tum niin, customer service atan AI-powered chatbots dah tel an tum bawk.

WhatsApp chuan kum 2018 khan an app-ah WhatsApp Business a lo siam tawh a, nikum khan active user hi thla khata mi maktaduai 200 vel an tling tawh. Telegram pawhin hei hi a rawn el chho ve zel a, mahse, anni erawh chuan monthly fee hi an la thung a ni.

Telegram hian tun hnaiah feature thar eng emaw zat a lo siam tawh bawk a, heng zingah hian Boosts for Groups, Stories from Groups, Emoji Status, Covers, Wallpapers, Link Styles, Group Emoji Packs, leh Voice-to-Text te an tel.

Kum 2013, August thla khan Nikolai leh Pavel Durov-te chuan Telegram hi siam chhuakin, August thlaah iOS tan a tichhuak a, hemi kum vek October-ah Android tan tihchhuah a ni zui ve leh a ni. Europe, Aisa leh Africa-ah an hmang lar hle a, tunah hian he chat app hian khawvel pumah user maktaduai 800 chuang nei mekin, India chu user tamna ber ram a ni.