Pakistan aṭanga India palai hnawh chhuah a rawn haw

Sorkar laipuiin Article 370 a tihtawp vanga Pakistan lungawi loin an rama India palai awm chu a hnawhchhuah thu a sawi hnuah, nimin khan Indian High Commissioner Ajay Bisaria chuan Delhi a rawn thleng. 

Article 370 chungchanga sorkar laipui thutlukna siam duh lohna lantirin, Pakistan chuan India nena an inlaichinna te a titawp a ni. August 7 khan India palai hi hnawhchhuah a nih thu a puang a, August 10-ah Bisaria hian Islamabad chhuahsanin, Dubai kaltlangin India-ah a rawn haw ta a ni. Pakistan chuan India rama Pakistan High Commisisoner a ruat thar, Moinul Haque pawhin a hna hi a zawm dawn lo tih a sawi bawk. 

External Affairs Ministry chuan Pakistan hnenah in palai tawnna a titawp chu ngaihtuah ṭha leh turin a ngen a, thutlukna a siam dan pawi a tih thu a sawi. Jammu and Kashmir chungchang chu ramchhung thil a ni a, Article 370 tihtawp pawh he bial mipuite ṭhatna tur ngaihtuah vanga ti zawk a nih thu a sawi. 



Share this Post

Login to comment
No Comments