NSA Doval-an Kashmir Valley enkual

National Security Advisor Ajit Doval chuan nimin khan thlawhtheihnain Srinagar leh Kashmir Valley a enkual. 

Jammu and Kashmir special status pekna, Article 370 tihtawp a nih hnuah J&K-ah hian khuahkhirhna khauh tak siam nghal a ni. Mahse Muslim-te hun pawimawh, Eid al-Adha vangin nimin khan punkhawm khapna thupek pawh thlahdul a ni a, mahse venhimna erawh khauh taka kalpui reng a ni. 

NSA Doval chuan thil awm thlithlaiin nimin khan thlawhtheihna hmangin a  enkual a, a ni bakah police hotu Dilbag Singh leh amry commander-te pawh thlawh­theihna hmang hian Kashmir Valley hmun hrang hrangh an enkual bawk. Officer-te chuan boruak awmdan a 

ṭha thawkhat tih an sawi a, Edi puala ṭawngṭai hun pawh hmun hrang hrangah boruak ṭha tak hnuaiah neih a ni, an ti. 

Police-te chuan hmun hrang hrangah ṭawngṭai tur hian mi tam tak an pung­khawm a, hmun ṭhenkhatah chuan buaina tenau chhuak erawh a awm tih an sawi. Mahse hei hi tunhma lam pawha lo thleng fo tawh 

ṭhin a ni tih sawiin, police-te chuan buaina siamtute hi chingfelin, nawrh huaihawta pungkhawmte pawh an hnawtdarh nghal tih an sawi. 

Mipui punkhawm khapna thlahdul a nih bakah, August 5 aṭanga inbiakpawhna lam khuahkhirhna pawh thlahdul ṭhen a ni bawk. Pawn lam mite an biakpawh theihna turin district commissioner office, police station leh police post hrang hrangah helpline dah a ni a, heng aṭang hian mi sang telin an chhungte an bia a ni. Srinagar bikah pawh ni khatah call 5,000 chuang zet siam a ni tih an sawi. Kashmir division-ah pawh phone hman theihna, public point 300 chuang siam a ni. Media mite tan media center-ah phone leh internet hman theiha dahsak an ni bawk niin official thuchhuah chuan a tarlang. 

Ministry of Home Affairs chuan Pathianni khan Jammu and Kashmir boruak a pangngai theihna tura thuneitute hmalakna hrang hrang a tlangzarh. Home ministry thuchhuah chuan treasury leh bank-te pawh dan pangngai anga an kal thu te, ATM te pawh a hman theih thu an tarlang a, pawisa lakchhuak duhten harsatna an tawh lohna turin ATM-ah pawisa a awm em tih pawh enfiah reng a ni tih a sawi. Sorkar hnathawkte hlawh pawh pekchhuah an ni a, development work hna thawhna tur sum pawh tihfel a ni, a ti. 

Mobile van-te chuan in kawtkaiah ngei kalin thlai, LPG cylinder, ar leh artui te an pe a, Eid-ul Azha puala an hlan theih turin beram nuai 2.5 vel pawh mipui lei theih tura dah a ni, tiin a sawi. 



Share this Post

Login to comment
No Comments