India-in Rohingya-te chenna in sak sak

India chuan Myanmar aṭanga Bangladesh rama tlanchhia, Rohingya Muslim-te chu an awmna lama an kir huna an chenna tur in a sak sak. 

Myanmar-a Rakhine state thuneitute hnenah India chuan in a sak 250 hi a hlan a, heng inte hi Bangladesh-a refugee camp-a khawsak mek, Rohingya Muslim te an kir leh huna an awmna tura a sak a ni. 

Myanmar-a India palai, Saurabh Kumar chuan Rakhine state minister leh Returnee Resettlement Work Committee joint-chairman U Aung Kya Zan hnenah heng inte hi a hlan a, hlanna inkhawm buatsaihah hian Myanmar union minister Win Myat Aye pawh a tel. 

India chuan Rakhine state-a development project kalpuina peng pakhat atan heng in a sak sakte hi Myan­mar sorkar hnenah a hlan a, China pawhin nikum kum tawp lam khan Rohingya raltlante tana in 1,000 a sak chu Myanmar kutah a lo hlan tawh bawk. 

Rohingya raltlante kir leh huna an awmna tur hi buaipui ni mah se, Bangladesh leh Myanmar sorkar chuan ral­tlante hruai kir tur chung­changah inremna mumal tak an la siam thei lo a ni. 

Bangladesh chuan raltlan hruai kir hna hi kalpui tawh tura a duh laiin, Myanmar sorkar chu tihkhawtlaiah a puh. 



Share this Post

Login to comment
No Comments