Sorkar laipuiin Mamata sorkar chhanna nghak


Sorkar laipui chuan West Bengal-a kawngpui siam a ṭha tawk lo hle tia report a nih avangin chief minister Mamata Ban­erjee kaihhruai sorkar chu insawifiah turin a hriattir. 

Union Ministry of Rural Development chuan central inspection team report aṭanga a lan danin, West Bengal sorkarin Pradhan Mantri Gram Sadak Yojana (PMGSY) hnuaiah kum kal ta chhunga kawngpui an siam 20% chu a chhiat thu leh a nih tur ang a nih loh thu a sawi. 

Inspection team-te report chuan kawngpui 230 an siam zinga 25 chu lirthei tlan ngaihna awm lo leh 54-te chu khuar leh rualrem lo tak vek an nih thu a sawi. PMGSY hnuaiah hian 2017-2018 chhung khan West Bengal a rural area-ah kawngpui km. 3,500 a thui siam tur a ni a, mahse km. 3,213 chauh siam zawh a ni.Panchayat department hnenah kawngpui siam thar chu eng vanga lirthei tlan thei lo nge a ni tih leh enkawl mumal a nih loh chhante sawifiah tura tih a ni bawk. Heivang hian Trinamool Congress (TMC) lakah West Bengal mipui an lungawi lo hle niin an sawi.

State BJP president Dilip Ghosh chuan tual­chhung TMC hruaitute kuta commission dah a ni chu a dem hle a, TMC rorel chhung hian state chhungah lei pali a chim tawh thu a sawi. Contractor-te lakah tual­chhung hotuten thamna an lak ṭhin avangin kawng­pui siam hian a tuar tih a sawi bawk. 

Panchayat minister Subrata Mukherjee chuan contractor-te chu a mawhphurtu an nih thu leh tumah zuah an neih loh tur thu a sawi thung.



Share this Post

Login to comment
No Comments