BJP-in West Bengal-ah 'Black Day' an hmang Basirhat-ah darkar 12 bandh an huaihawt

West Bengal-a Bharatiya Janata Party (BJP) chuan tun Pathianni kha 'Black Day' atan an hmang a, North 24 Parganas district-a Basirhat subdivision huam chhungah nimin khan darkar 12 bandh an huaihawt bawk.

Inrinni khan Basirhat-a Sandeshkhali area-ah BJP leh Trinamool Congress inkarah buaina nasa tak a chhuak a, mi paliin nunna an chan phah hial. He buaina chhuakah hian BJP leh TMC hi an inpuhtawn nasa hle a, union home ministry chuan state sorkar hnenah buaina chhuak report hi thehlut turin an ti hial a ni.

Nimina bandh huaihawtah hian Basirhat-ah chuan rel tlan pawh darkar hnih lai tihdin a ni a, Sealdah route-a rel tlan a tibuai hle a ni. Zing dar 7-9 inkarah rel tlan hi tihdin a ni a, police-te leh railway thuneitute an inrawlh hnuah rel hi tlan tir leh chauh a ni. BJP worker-te chuan Neuli kawng pawh an dang a, Neuli hi Inrinni-a thihna thlenna hmun kha a ni a, kawng dang pawh an dang nia sawi a ni bawk. 

Pathiannia 'Black Day' an hmannah pawh khan Basirhat-a dawr eng emaw zat chu khar a ni a, state thuneitute chuan internet leh network connection-te an titawp bawk a ni. 

BJP activist-te chuan Trina­mool Congress president leh West Bengal chief minister ni bawk Mamata Banerjee lim chu Habra-ah an hal a ni. 



Share this Post

Login to comment
No Comments