Article 370 hi J&K leh India inzawmna a ni : Congress candidate

Jammu and Kashmir-a  Udhampur-Doda Lok Sabha seat biala Congress candidate, Maharaja Hari Singh-a tupa Vikramditya Singh chuan BJP-in an manifesto-a ṭhiah a tiam, Constitution Article 370 chu Jammu and Kashmir lalram leh India ram inthlunzawmna pawimawh tak a ni, a ti. 

BJP chuan an election manifesto-ah sorkarna an siam leh a nih chuan J&K hnena special status pekna, Article 370 leh 35A chu an ṭhiah tur thu an sawi a ni. Hei hi state chhung political party hrang hrang hruaitute chuan na takin an sawisel a, state mipuite pawhin an duh lo hle. 

Vikramaditya chuan Congress party chuan special status chungchang hi manifesto-ah chiang takin a tarlang a, thlak danglam an remti dawn lo niin a sawi.

National Conference (NC) presient Farooq Abdullah chuan tun ṭum Parliament inthlanpui chu Indian union-ah Jammu and Kashmir a awm chhunzawm zel dawn leh dawn loh hriltu tur a nih thu a sawi. J&K chuan peng hrang hrang aṭangin beihna a tawk reng tih sawiin, special status an neihte tihchhiat sak tumin beih an tawk mek a, an history te nuaibo sak an tum niin union minister hlui chuan a sawi. Prime Minister Narendra Modi chu kawng engkima hlawhchhamah a puh bawk. "PM Modi hian kum 2014 inthlan dawn a thuthiamte a tihlawhtling lo a ni ngawt lo a, sorkar hmasain thil ṭha a lo tihtawhte pawh a chawk buai zel zawk a ni" tiin, Modi chu a rorelna dik lo tak thupna atana Pakistan chungchang sawi uarah a puh a, Pulwama-a CRPF convoy beih a nih dan pawh chhui chian a phut thu a sawi a ni. 



Share this Post

Login to comment
No Comments