Bodh Gaya beitua puhte thiam loh chantir

Patna-a special National Investigation Agency (NIA) court chuan kum 2013-a Bodh Gaya-a bomb tipuaktua puh mi panga chu thiam loh a chantir. Thiam loh chantirte hi an vaiin Indian Mujahideen firfiak pawl member an ni. 

Kum 2013, July 7 khan Buddist ho hmun pawimawh, Maha Bodhi temple bul velah bomb 10 zet tihpuah a ni a, mi panga in hliam an tuar a, an zingah hian Buddist puithiam pahnih an tel a ni. Nimina court in thiam loh a chantir zingah hian pawikhawihna thlen tura ruahmantu ber nia puh, Haider Ali pawh a tel a ni. He pawikhawihnaa inhnamhnawiha puh zinga pakhat erawh chu kum 18 a la tlin loh avangin nikum khan juvenile court chuan kum thum chhung remand home-a awm turin a lo ti tawh a ni. Karleh Ningani-ah thiam loh chantirte hremna pek tur hi puan a ni ang. 

Maha Bodhi temple hi UNESCO World Heritage Site-a puan a lo ni tawh a, kumtini Buddist sakhaw zuitu tam takin he  hmun hi an tlawh ṭhin a, a bikin Myanmar leh Asia ram hrang hrang aṭangin tlawhtu an tam thei hle. Pawikhawihna thlen a nih hnu hian he temple hi Intelligence Bureau (IB) leh Research and Analysis Wing chuan enzui leh ven uluk ngai zingah a telh nghal a ni. 



Share this Post

Login to comment
No Comments