TN-ah eptuten nawrh huaihawt

Tamil Nadu chhim lam, Thoothukudi (Tuticorin)-a Sterlite Industries-in copper smelting plant a siam duh lohna lantira police-te silai hmehpuah vanga mi 13 thihna thleng vangin nimin khan eptu party-ten nawrh an huaihawt. 

Nimina nawrh huaihawt hi eptu pawl lian ber Dravida Munnetra Kazhagam (DMK) kaihhruai hruaihawt niin, eptu pawl dang Congress, IMUL, MdMK, VCK, CPI, CPI(M) leh MMK ten an zawm a ni. Tamil Nadu state chhung hmun hrang hrang bakah Puducherry-ah nawrh hi huaihawt a ni. Nawrh huaihawtnaa tel Dravida Munnetra Kazhagam (DMK) MP Kanimozhi bakah VCK hotu Thirumalvalavan te chu hren an ni. 

Tuticorin-a tharum thawhna thleng leh, civil mite lam hawia police-ten silai an hmehpuah chungchanga state sorkar chu hna thawk ṭha tawk loa puhin eptute chuan Chief Minister K Palaniswami chu bang turin an phut a ni. Mahse CM chuan buaina a punlun chhanah political party ṭhenkhat leh NGO te a puh a, buaina chawk chhuak thei zawnga mipuite rilru hruaikawi sakah a puh a ni. Mipui pungkhawmte hian venhim hna thawktu police-te chu lunga tawnga an beih avangin police-te hian mahni invenna tura an chet ve a ngai niin a sawi. 

Sterlite copper smelting plant hian boruak a tibawlhhlawh nasa nia sawiin a chhehvel biala mipuite chuan thla thum zet duh lohna an lo lantir tawh a ni. Tunkar tir lama nawrh an huaihawtnaah police-te nen innawr buaiin tharum thawhna nasa tak a chhuak zui ta a ni. 

Tamil Nadu sorkar pawhin copper smelting plant khartir chu a duh tih sawiin, hma a lak thu a sawi. Madras High Court-a Madurai bench chuan plant siam hna thawk mek chu chawlhsan rih turin a lo hriattir tawh a, Tamil Nadu Pollution Control Board chuan Thoothukudi  District Collector hnenah plant-a power supply pek chu titawp turin a hriattir tawh bawk. 



Share this Post

Login to comment
No Comments